18.12.2025 | 23:24
ՀՀ տարածքում ավտոճանապարհները հիմնականում անցանելի են
Ռուսաստանը ռազմական հանցագործություններ է կատարել Ուկրաինայում․ ԵԱՀԿ առաքելություն
Քաղաքականություն
13.04.2022 | 19:56
ԵԱՀԿ առաքելությունն Ուկրաինայում ռազմական հանցագործությունների ապացույցներ է գտել և պատասխանատվության առյուծի բաժինը բարդել է Ռուսաստանի վրա, գրում է BBC-ի ռուսական ծառայությունը։
Առաքելության նախնական զեկույցը, որը կազմվել է ԵԱՀԿ 57 երկրներից 45-ի որոշմամբ՝ չնայած ռուսական կողմի առարկություններին, հրապարակվել է չորեքշաբթի։
Դրանում ասվում է, որ առաքելությունն ի վիճակի չէ գնահատել՝ արդյո՞ք ներխուժումն ինքնին լայնածավալ գործողություն է խաղաղ բնակչության դեմ, սակայն նշում է միջազգային նորմերի բազմիցս փաստագրված խախտումները։
«Դիտավորյալ սպանությունները, քաղաքացիական անձանց, այդ թվում՝ լրագրողների և տեղական պաշտոնյաների առևանգումները, ամենայն հավանականությամբ, համապատասխանում են այս չափանիշին: Այս ներխուժման շրջանակում կատարված ցանկացած նման բռնի գործողություն հանցագործություն է մարդկության դեմ»,- ասվում է զեկույցում։
Փաստաթղթում նշվում են ինչպես ուկրաինական, այնպես էլ ռուսական կողմի խախտումները, սակայն ՌԴ-ի կողմից իրականացված խախտումները, ըստ զեկույցի, ավելի լուրջ են ու մասշտաբային։
ԵԱՀԿ-ն ուսումնասիրել է նաև Մարիուպոլի թատրոնի և ծննդատան ռմբակոծումները։ Առաքելությունը եզրակացրել է, որ ծննդատունն ավերվել է ռուսական ուժերի հարձակման հետևանքով։
«Ուստի այս հարձակումը միջազգային մարդասիրական իրավունքի ակնհայտ խախտում է։ Դրա համար պատասխանատուները ռազմական հանցագործություն են կատարել»,- ասվում է զեկույցում։
Նույնը վերաբերում է նաև թատրոնի ավերմանը, որտեղ Մարիուպոլի հարյուրավոր բնակիչներ թաքնվում էին ռմբապաստարանում, իսկ շենքի երկու կողմում գրված էր «Երեխաներ»։
Էմմա Չոբանյան
