Ջո Բայդենն առաջին անգամ Ուկրաինայի դեմ Ռուսաստանի պատերազմը նույնացրել է ցեղասպանության հետ

ԱՄՆ նախագահ Ջո Բայդենն առաջին անգամ Ուկրաինայի դեմ Ռուսաստանի պատերազմը նույնացրել է ցեղասպանության հետ։ Երեքշաբթի՝ ապրիլի 12-ին Այովա նահանգում ելույթի ժամանակ Սպիտակ տան ղեկավարը, խոսելով գազի գների բարձրացման մասին, նշել է. «Ձեր ընտանեկան բյուջեն, գազը լցնելու ձեր կարողությունը չպետք է կախված լինի աշխարհի մյուս ծայրում գտնվող բռնապետից, որը պատերազմ է հայտարարում և ցեղասպանություն է գործում»:

Ավելի ուշ նա կրկին կրկնել է այս բնորոշումը, գրում է DW-ի ռուսական ծառայությունը։

«Այո՛, ես դա անվանեցի ցեղասպանություն։ Ավելի ու ավելի ակնհայտ է դառնում, որ Պուտինը փորձում է աշխարհի երեսից ջնջել այն գաղափարը, որ կարելի է ուկրաինացի լինել»,- ելույթից հետո լրագրողների հարցերին ի պատասխան՝ ասել է Բայդենը:

ԱՄՆ նախագահը հավելել է, որ աճում են վկայությունները «իսկապես սարսափելի բաների մասին, որոնք ռուսներն արել են Ուկրաինայում, և մենք դեռ շատ ավելին կիմանանք ավերածությունների մասին»։ Բայդենի խոսքով՝ փաստաբանները պետք է հաստատեն՝ արդյո՞ք ՌԴ զինվորականների գործողությունները միջազգային չափանիշներով ցեղասպանություն է, սակայն իր համար դա անկասակած է։

Ջո Բայդենի խոսքերը ողջունել է Ուկրաինայի նախագահ Վլադիմիր Զելենսկին։

«Ճշմարիտ խոսքեր իսկական առաջնորդից։ Կարևոր է իրերն իրենց անուններով կոչել՝ չարին դիմակայելու համար: Մենք երախտապարտ ենք ԱՄՆ-ի կողմից արդեն իսկ ցուցաբերած օգնության համար և ավելի ծանր սպառազինության շտապ կարիք ունենք՝ դադարեցնելու ՌԴ-ի հետագա վայրագությունները»,- գրել է նա Twitter-ի իր էջում:

Տաթև Ֆռանգյան