«Դատապարտում եմ զինված ստուգումները, եթե դրանք օրինական չեն». Միհրան Պողոսյանը՝ «Քեթրին գրուպում» հարկային ստուգումների մասին

«Քեթրին գրուպի» հիմնադիր, ԱԺ ՀՀԿ պատգամավոր Միհրան Պողոսյանը այսօր factor.am-ի հետ զրույցում դատապարտեց զինված հարկային ստուգումները «Քեթրին գրուպում»:

«Դատապարտում եմ զինված ստուգումները, եթե օրենքով սահմանված կարգի խախտում է տեղի ունեցել: Ես չգիտեմ տվյալ դեպքում ինչ է եղել «Քեթրին գրուպում»,- մեր հարցին ի պատասխան ասաց Միհրան Պողոսյանը:

Նշենք, որ օրերս մամուլում տեղեկություն եղավ, որ ՊԵԿ շուրջ 50 զինված աշխատակիցներ մուտք են գործել «Քեթրին Գրուպ» ՍՊԸ տարածք՝ ստուգումներ իրականացնելու համար։ Ըստ այդմ՝ խոսք է գնացել 40 մլն դրամ հարկային պարտավորություն թաքցնելու մասին:

Միհրան Պողոսյանը նաև պնդեց, թե իր հիմնադրած «Քեթրին գրուպի» հետ մոտ 10 տարի առնչություն չունի: «Քեթրին գրուպը հիմնել եմ 1997 թ-ին, դրանից անցել է ավելի քան 20 տարի: Ինձ է պատկանում «Քեթրին գրուպ» ընկերության շենքը, որը տվել եմ վարձակալության»,- ասաց ԴԱՀԿ նախկին պետը:

Դիտարկմանը, թե իր շենք են փաստորեն փորձել մտնել զինված հարկային ստուգողները, Պողոսյանն ասաց. «Ճիշտն ասած, ես չգիտեմ, որ շենք են մտել: Վարձակալությամբ տվել եմ այդ շենքը և այսօր ոչ մի իրավական գնահատական տալու իրավունք չունեմ պետական մարմնի և «Քեթրին գրուպ» ՍՊԸ-ի գործունեության վերաբերյալ»:

Հիշեցնենք, որ «Քեթրին Գրուպը» հանրապետություն բանան ներկրող խոշորագույն ընկերությունն է։

Մանրամասները դիտեք factor.am-ի հետ ԱԺ ՀՀԿ պատգամավոր Միհրան Պողոսյանի հարցազրույցում:

Մարինե Խառատյան