18.12.2025 | 17:43
Եկել եմ Գերագույն հոգևոր խորհրդի նիստին, օրակարգը չգիտեմ. Վահան սրբազան․ ՏԵՍԱՆՅՈՒԹ
Ռուսական բանակն առնվազն 24 անգամ կասետային զինամթերք է կիրառել Ուկրաինայում․ ՄԱԿ
Քաղաքականություն
31.03.2022 | 16:40
Ռուսական բանակը լայնածավալ ռազմական գործողությունների ընթացքում Ուկրաինայի բնակավայրերում առնվազն 24 անգամ օգտագործել է կասետային զինամթերք։ Ukrinform-ի փոխանցմամբ՝ այս մասին հայտարարել է ՄԱԿ-ի Մարդու իրավունքների գրասենյակի ղեկավար Միշել Բաչելեթը։
«Վստահելի հաղորդագրությունները ցույց են տալիս, որ ռուսական ռազմական ուժերը փետրվարի 24-ի ներխուժումից հետո առնվազն երկու տասնյակ անգամ օգտագործել են կասետային զինամթերք Ուկրաինայի բնակեցված տարածքներում»,- ասվում է հայտարարության մեջ:
Բաչելեթի խոսքով՝ մեկ ամսից ավելի է, ինչ Ուկրաինայի ողջ բնակչությունն իսկական սարսափ է ապրում․ «Միլիոնավոր մարդկանց կյանքեր գլխիվայր շուռ են եկել, քանի որ նրանք ստիպված են եղել լքել իրենց տները կամ թաքնվել նկուղներում և ռմբապաստարաններում, քանի որ նրանց քաղաքները գնդակոծվում և ավերվում են»:
ՄԱԿ-ի փախստականների հարցերով գործակալության տվյալներով՝ մինչ օրս ավելի քան չորս միլիոն մարդ ստիպված է եղել լքել Ուկրաինան և մեկնել հարևան երկրներ, որից 2,3 միլիոնն այժմ գտնվում է Լեհաստանում, 608 հազարը՝ Ռումինիայում և հարյուր հազարավորները՝ Մոլդովայում, Հունգարիայում, Ռուսաստանում և Սլովակիայում։
ՅՈՒՆԻՍԵՖ-ի տվյալներով՝ ավելի քան երկու միլիոն երեխա է լքել Ուկրաինան։ Ժնևի ֆորումում ՄԱԿ-ի Մարդու իրավունքների գերագույն հանձնակատարը հայտնել է նաև, որ ռուսական հրթիռակոծության հետևանքով վնասվել են բժշկական հաստատություններ, այդ թվում՝ 50 հիվանդանոց։
ՄԱԿ-ի Մարդու իրավունքների խորհրդի նախագահ Ֆեդերիկո Վիլեգասը հայտարարել է Ուկրաինա Ռուսաստանի ներխուժման ժամանակ կատարված ռազմական հանցագործությունների և այլ չարաշահումների հետաքննման հանձնաժողովի ստեղծման մասին: Հանձնաժողովը կազմված է երեք անդամից՝ Էրիկ Մեսսեն Նորվեգիայից՝ (նախագահ), Յասմինկա Ձումհուրը՝ Բոսնիա և Հերցեգովինայից, Պաբլո դե Գրեյֆը՝ Կոլումբիայից:
Տաթև Ֆռանգյան
