Քաղաքականություն
31.03.2022 | 14:35
Ատոմային էներգիայի միջազգային գործակալության (ՄԱԳԱՏԷ) ղեկավար Ռաֆայել Մարիանո Գրոսսին ճգնաժամային է անվանել ուկրաինական գրավված ատոմակայաններում իրավիճակը։ Այս մասին գրում է korrespondent-ը՝ հղում կատարելով Էներգոատոմի մամուլի ծառայությունը։
«Որպես միջազգային կազմակերպություն՝ մենք մշտապես հետևելու ենք այս իրավիճակին, կարծում ենք, որ սա կրիտիկական իրավիճակ է, և ամեն ինչ կանենք դրա լուծումը մոտեցնելու համար»,- ասել է նա՝ վստահեցնելով, որ ատոմակայաններում տեղի ունեցող իրադարձությունները հնարավոր չէ թաքցնել։
Գրոսսիի խոսքով՝ ռուսական զորքերի կողմից օկուպացված Չեռնոբիլի և Զապորոժիեի ատոմակայանների ազատագրման հարցը պետք է դիտարկել տարբեր մակարդակներում։ Նա ասել է նաև, որ իր այցի ընթացքում կքննարկվեն Ուկրաինային աջակցության ու օգնության հարցեր։
«Դուք պետք է իմանաք, որ բազմաթիվ երկրների ներկայացուցիչներ դիմել են մեզ՝ մեր կազմակերպության միջոցով աջակցություն ցուցաբերելու առաջարկներով»,- ասել է ՄԱԳԱՏԷ-ի ղեկավարը։
Բացի այդ, Գրոսսին Թվիթերում գրել է. «Դիտարկվել են կոնկրետ քայլեր միջուկային օբյեկտների անվտանգությունն ապահովելու համար շտապ օգնության անհապաղ տրամադրման համար»:
Հիշեցնենք՝ Ռուսաստանի զինված ուժերը փետրվարի 24-ին գրավել էին Չեռնոբիլի ատոմակայանի մեկուսացման գոտին, իսկ մարտի 4-ին՝ Զապորոժիեի ատոմակայանի տարածքը։
Տաթև Ֆռանգյան
