Աֆղանստանում կանանց արգելել են առանց տղամարդկանց ուղեկցության ճամփորդել օդանավով

Քաբուլի օդանավակայանի աշխատակիցները տասնյակ աֆղանցի կանանց թույլ չեն տվել ինքնաթիռ նստել, քանի որ նրանք եղել են առանց տղամարդկանց ուղեկցության։ Այս մասին հայտնում է France24-ը։

Գործակալության տվյալներով՝ առանց տղամարդկանց օդանավակայան ժամանած կանանց մարտի 25-ին թույլ չեն տվել ինչպես ներքին, այնպես էլ միջազգային թռիչքներ կատարել։ Նրանց մերժել են նստել դեպի Իսլամաբադ, Դուբայ և Թուրքիա թռիչքներ կատարող ինքնաթիռները, որոնք իրականացնում են աֆղանական Kam Air և Ariana ավիաընկերությունները:

Հաղորդվում է, որ կանանցից ոմանք ունեցել են երկքաղաքացիություն և պատրաստվում էին վերադառնալ արտասահմանում գտնվող իրենց տները:

«Առանց տղամարդկանց ուղեկցության կանանց թռիչքներ թույլ չտալու հրամանը տրվել է «Թալիբան» շարժման ղեկավարությունից»,- հայտնել են օդանավակայանից:

Սակայն մարտի 26-ին որոշ ուղևորների թույլ են տվել բարձրանալ Ariana Airlines ավիաընկերության օդանավը, որը թռել է դեպի արևմտյան Հերաթ նահանգ:

Բացի այդ, Քաբուլի տուրիստական գործակալությունների ներկայացուցիչները TOLOnews-ի լրագրողներին ասել են, որ ավիաընկերություններից հրահանգներ են ստացել, որոնք արգելում են տոմսերի վաճառքը կանանց, ովքեր ճանապարհորդում են առանց տղամարդկանց ուղեկցության։ Հանգստյան օրերին նրանք նաև որոշում են ընդունել, որ կանայք և տղամարդիկ չեն կարող նույն օրերին այցելել մայրաքաղաքի այգիներ։

Հիշեցնենք, որ իշխանության վերադառնալուց հետո թալիբները խոստացել էին կոշտ կառավարման ավելի մեղմ տարբերակ, որը բնութագրում էր նրանց իշխանության առաջին շրջանը՝ 1996-2001 թվականները, սակայն նրանց խոստումներն այդպես էլ կյանքի չեն կոչվել։

Կանայք գնալով ավելի ու ավելի են հեռացվում հասարակական կյանքից. զրկվում են դպրոցից և պետական աշխատանքից, ինչպես նաև ստիպված են հագնվել թալիբների կողմից Ղուրանի խիստ մեկնաբանության համաձայն:

Տաթև Ֆռանգյան