16.09.2026 | 21:15
Վթար Չարենցավան-Հրազդան ավտոճանապարհին. նախնական տվյալներով՝ կան չորս զոհ, մեկ տուժած
8,2 մլն դոլար՝ իրավապահ մարմիններին, որից 1,3 մլն դոլարը՝ ՔԿ-ի քննիչների աշխատավարձի բարձրացմանը
Քաղաքականություն
23.03.2022 | 22:38
Ազգային անվտանգության ծառայության, ոստիկանության և քննչական կոմիտեի քննիչների աշխատավարձերը բարձրացնելու նպատակով Հայաստանի պետական բյուջեից 4 մլրդ 103 մլն դրամ կհատկացվի: Այս մասին տեղեկանում ենք ՀՀ կառավարության կայքից:
Այս գումարից 643 մլն 500 հազար դրամ կամ 1,3 մլն դոլար կհատկացվի Արգիշտի Քյարամյանի ղեկավարած Քննչական կոմիտեին: Ֆինանսների նախարարության հեղինակած որոշման մեջ նշվում է, որ վերջին տարիներին քրեական գործերի քանակի աննախադեպ աճով պայմանավորված քննիչները գերբեռնված են աշխատում, անհրաժեշտություն կա նրանց աշխատավարձը բարձրացնել, քանի որ շատերն աշխատանքից դուրս են գալիս:
Ֆիննախը գումարը հատկացնելու այսպիսի հիմնավորում է ներկայացրել. «Գումարը հատկացվում է Քննչական կոմիտեի ինքնավար պաշտոններ զբաղեցնող անձանց (քննիչների) ֆինանսական վիճակը փոքր-ինչ բարելավելու և արտահոսքը որոշ չափով կանխելու նպատակով»:
Ուշագրավ է, որ նախագծում ընդհանուր գումարից միայն ՔԿ-ին հատկացվող մասն է առանձնացված, իսկ թե ԱԱԾ-ին ու ոստիկանությանը որքանն է բաժին հասնում, նախագծում չի նշվում:
4,1 մլրդ կամ 8,2 մլն դոլար հատկացնելու մասին նախագիծն ընդգրկված է կառավարության չզեկուցվող հարցերի ցանկում: Չնայած Նիկոլ Փաշինյանը վստահեցնում է, թե քաղաքացիները չզեկուցվող նախագծերին կարող են ծանոթանալ կառավարության կայքում, բայց անհերքելի է, որ եթե լրատվամիջոցները չանդրադառնան չզեկուցվող նախագծերին, ապա դրանք այդպես էլ հանրության լայն շրջանակներին համար անհայտ կմնան:
Նարեկ Կիրակոսյան
