Էրդողանը ձգտում է Եվրոպայում գտնվող թուրքերին համախմբել քաղաքական իսլամի շուրջ

Թուրքիայի նախագահ Ռեջեփ Թայիփ Էրդողանը Եվրոպայում գտնվող թուրքերին փորձում է համախմբել քաղաքական իսլամի շուրջ։ Այս մասին ասվում է Nordic Research & Monitoring Network-ի զեկույցում, որը ներկայացնում է «Ահվալ» գործակալությունը։

Նշվում է, որ Էրդողանը, որը Եվրոպայում ապրող թուրքերին ակնհայտորեն դիտարկում է որպես Թուրքիայի, այլ ոչ թե այն երկրների քաղաքացիներ կամ բնակիչներ, որտեղ նրանք ապրում, աշխատում և թոշակի են անցնում, կոչ է անում բոլորին՝ միավորվել մեկ ազգի և մեկ դրոշի ներքո։

Անցյալ ամիս Էրդողանն ասել էր, որ երբ Թուրքիան մոբիլիզացնի իր ուժը, «ոչ մի կազմակերպություն, ոչ մի կառույց, ոչ մի թաքնված կամ բացահայտ խոչընդոտ չի կարող կանգնել նրա ճանապարհին»։ Նա ելույթ է ունեցել Միջազգային դեմոկրատների միության (UID) կողմից կազմակերպված հանդիպմանը, որը հայտնի է որպես Էրդողանի «Արդարություն և զարգացում» կուսակցության պրոքսի խումբ արտասահմանում։

Նախկինում խումբը կոչվում էր Եվրոպական թուրք դեմոկրատների միություն, որը գնահատվում է որպես Գերմանիայի սահմանադրական կարգի հետ անհամատեղելի՝ համաձայն Գերմանիայի ներքին հետախուզական գործակալության։

Խումբն ունի 253 մասնաճյուղ՝ 17 երկրներում 38 տարածաշրջանային կազմակերպություններով: Իր ելույթում Էրդողանը ցուցումներ էր տվել UID-ի անդամներին՝ ավելի շատ աշխատել իրենց նպատակներին հասնելու համար։

«Ինչքան շատ տարածվի այս հովանոցը որպես UID, այնքան ավելի կմեծացնեք ձեր գործունեության և ազդեցության ոլորտը, այնքան ավելի հաջողությամբ կարող եք իրականացնել այս ուղերձները մեր քաղաքացիներին հասցնելու, դրանք կազմակերպելու և ապագայի համար նախապատրաստելու առաքելությունը»,- ասել էր Էրդողանը։

Նա նշել էր, որ հարյուր միլիոնավոր մահմեդական ընկերներ ու եղբայրներ կանգնած են թուրքերի թիկունքում։ Էրդողանն ասել էր, որ Թուրքիան, որին աջակցում են Եվրոպայում թուրքերն ու մյուս մահմեդականները, «կխափանեն եվրոպական կառավարությունների կողմից մշակված ցանկացած ծրագիր»։

«Միասին մենք կփչացնենք նրանց դավադրությունները, որոնք փորձում են բաժանել մեր ժողովրդին, և միասին մենք դրանք կտապալենք նրանց գլխին»,- ասել էր Թուրքիայի նախագահը։

Էմմա Չոբանյան