28.04.2026 | 15:37
Ժամանակավորապես կարգելվի Հանրապետության հրապարակի շրջանաձև երթևեկությունը
ՀՀ կրթության և գիտության նախարարության կոչը ծնողներին և աշակերտներին
Հասարակություն
23.04.2018 | 14:02
Հաշվի առնելով հանրապետությունում ստեղծված իրադրությունը և նկատի ունենալով, որ զանգվածային երթերին մասնակցում են դպրոցահասակ երեխաներ՝ ՀՀ կրթության և գիտության նախարարությունը ևս մեկ անգամ հորդորում է ակցիաների կազմակերպիչներին և մասնակիցներին՝ զերծ մնալ կրթական գործընթացի տապալման փորձերից և անչափահասներին քաղաքական գործընթացներում ներգրավելու նախաձեռնությունից:
Հարգելի՛ ծնողներ, դպրոցահասակների տարերային մասնակցությունը զանգվածային միջոցառումներին կարող է տարատեսակ վտանգավոր իրավիճակներ ստեղծել՝ երեխաների անվտանգության և առողջության տեսանկյունից: Ուստի, խնդրում ենք ուշադիր լինել, որ երեխաները բնականոն ռեժիմով հաճախեն դպրոց և մասնակցեն ուսումնական գործընթացին, ինչպես նաև տեղակացված լինել նրանց գտնվելու վայրի և հնարավոր նախաձեռնություններին մասնակից դառնալու մտադրությունների մասին:
Սիրելի՛ աշակերտներ, դուք մեր պետության վաղվա օրն եք, և ձեր անվտանգությունն ու առողջությունն ամենաթանկն ու կարևորն է երկրի համար: Ձեր քաղաքացիական ինքնագիտակցությունն ու պատասխանատվությունը, նաև երկրի վաղվա օրվա հանդեպ ձեր մտահոգությունը պահանջում են չանել քայլեր, որոնք կարող են վտանգել ձեր իսկ անվտանգությունը և անհանգստություն պատճառել ձեր ծնողներին ու ուսուցիչներին:
