26.06.2026 | 22:47
Ադրբեջանը ՆԱՏՕ-ի հուսալի գործընկեր է․ դաշինքի հատուկ ներկայացուցիչ
Ռուս-ուկրաինական պատերազմի հետևանքները․ Թուրքիայի խանութներում արևածաղկի ձեթի կտրուկ թանկացման հետևանքով հերթեր են
Քաղաքականություն
07.03.2022 | 22:53
Թուրքիայի քաղաքացիները, որոնք ցանկանում են ավելի էժան արևածաղկի ձեթ գնել՝ նախքան հերթական թանկացումները, երկրի տարբեր ծայրերում խանութներում երկար հերթեր են գոյացրել, նաև մարդկանց միջև հրմշտոց ու բախումներ են գրանցվել, գրում են թուրքական լրատվամիջոցները։
Ռուսաստանի և Ուկրաինայի միջև պատերազմի պատճառով մեկ տոննա անմշակ արևածաղկի ձեթը 1․400 դոլարից հասել է ավելի քան 2․000 դոլարի։ Այս թանկացումից հետո քաղաքացիները սկսել են դատարկել խանութները։
Սոցցանցերում տարածվում են լուսանկարներ ու տեսանյութեր, թե ինչպես են մարդիկ շտապում արևածաղկի ձեթ գնել խանութներից, արդյունքում հրմշտոց է առաջանում, հսկայական հերթեր են գոյանում։
Միաժամանակ, Թուրքիայի Անվտանգության գլխավոր վարչությունը (EGM) մարտի 6-ին հայտարարել է, որ հետաքննություն է սկսել սոցցանցերի 45 օգտահաշիվների նկատմամբ՝ կապված արևածաղկի ձեթի գների վերաբերյալ «սադրիչ և ապատեղեկատվական գրառումների» հետ։
«Այն տեղեկությունները, որ հիմնական պարենային ապրանքների, օրինակ՝ արևածաղկի ձեթի պաշարները բավարար չեն, ճիշտ չեն։ Ձեռնարկվել են անհրաժեշտ միջոցառումներ։ Մեր երկիրն ունի արևածաղկի ձեթի բավարար պաշարներ։ Մի հենվեք անհիմն պնդումների վրա։ Անհանգստանալու ոչինչ չկա»,- թվիթերյան իր էջում գրել է Թուրքիայի գյուղատնտեսության ու անտառային տնտեսության նախարար Վահիթ Քիրիշչին։
Էմմա Չոբանյան
