23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Պուտինին իրական պատճառներ պետք չեն լինի վաղը Լեհաստանի, Էստոնիայի, նույնիսկ ԱՄՆ-ի վրա հարձակվելու համար․ ուկրաինացի լրագրող
Քաղաքականություն
05.03.2022 | 20:15
Պուտինին կարող է կանգնեցնել միայն աշխարհի լիակատար աջակցությունը Ուկրաինային, և խոսքը միայն տնտեսությանը փողով աջակցելու կամ պատերազմից փախչող կանանց, երեխաներին ու տարեցներին հյուրընկալելու պատրաստակամության մասին չէ։ Factor.am-ի հետ զրույցում նման կարծիք հայտնեց ուկրաինական ExpresoTV-ի լրագրող Անդրեյ Յանիտսկին՝ անդրադառնալով Ուկրաինայում ստեղծված իրավիճակին և աշխարհից իրենց սպասելիքների մասին։
«Մեզ պետք է օգնեն, որ ռուսական հրթիռների համար Ուկրաինայի երկինքը փակ լինի։ Մնացածն ինքներս կանենք։ Արևմուտքը կարծում է, որ այդպիսով պատերազմի մեջ կմտնի։ Բայց Արևմուտքն ինքն իրեն խաբում է․ նա արդեն պատերազմի մեջ է»,- նշեց նա։
Ուկրաինացի լրագրողը նկատեց՝ ռուսական քարոզչությունն արդեն ասում է, որ իրենք պատերազմում են Արևմուտքի հետ, ասում է, որ Ուկրաինայում արդեն կան ՆԱՏՕ-ի բազաներ։
«Պուտինին իրական պատճառներ պետք չեն լինի վաղը Լեհաստանի, Էստոնիայի, նույնիսկ ԱՄՆ-ի վրա հարձակվելու համար։ Եթե ցանկանա, դա կանի առանց պատճառի, ինչպես արեց Ուկրաինայի դեպքում։ Պատճառներն ընթացքում ի հայտ կգան»,- նկատեց մեր զրուցակիցը։
Խոսելով ստեղծված իրավիճակի կարգավորման մասին՝ Անդրեյ Յանիտսկին նշեց, որ դիվանագիտական որևէ լուծում այս պահին հնարավոր չի համարում։
«Պուտինն ու նրա համախոհները ռազմական հանցագործներ են, ովքեր սպանում են անմեղ քաղաքացիներին, այդ թվում՝ երեխաներին։ Աշխարհը պետք է օգնի Ուկրաինային ազատագրել իր տարածքները և պատժել Պուտինին բոլոր հանցագործությունների համար»,- ասաց Յանիտսկին՝ հավելելով, որ իրավիճակի կարգավորումը հնարավոր է միայն Պուտինից հետո՝ Ռուսաստանի նոր իշխանությունների հետ, ամբողջ ուկրաինական տարածքի, այդ թվում՝ Ղրիմի ազատագրումից, Ռուսաստանի ապառազմականացումից և ժողովրդավարացումից հետո։
Անդրադառնալով Ուկրաինայի նախագահ Զելենսկիի՝ ՆԱՏՕ-ին ուղղված քննադատություններին, որ ուկրաինական օդը փակելուց խուսափելու արդյունքում «կանաչ լույս են վառել» ռուսական զորքերի համար, Անդրեյ Յանիտսկին նշեց․ «Ուկրաինացիները հիասթափված են ՆԱՏՕ-ի առանձին անդամների անվճռականությունից, որոնք աչք են փակում խաղաղ բնակիչների ջարդերի վրա: Ռուսաստանը ցեղասպան քաղաքականություն է վարում, փորձում է ոչնչացնել ուկրաինացիներին՝ որպես ազգ, իսկ Ուկրաինան՝ որպես պետություն։ Մենք լիովին աջակցում ենք նախագահ Զելենսկիին և նրա հայտարարությունները»։
Նրա նկատառմամբ՝ եթե ՆԱՏՕ-ն պատրաստ չէ փակել Ուկրաինայի ամբողջ երկինքը, ապա կարելի է այլ տարբերակներ դիտարկել, օրինակ՝ փակել միայն ատոմակայանների երկինքը՝ միջուկային աղետը կանխելու համար։
«Փակե՛ք երկինքը երկրի արևմտյան մասի վրա, որտեղ այժմ տեղափոխվել են միլիոնավոր ներքին տեղահանվածներ։ ՀՕՊ ժամանակակից համակարգեր և ինքնաթիռներ տեղափոխեք Ուկրաինա՝ որքան հնարավոր է շուտ, որպեսզի ուկրաինացիները կարողանան պաշտպանվել հրթիռային հարձակումներից»,- կոչ արեց ուկրաինացի լրագրողը։
Ուկրաինան խաղաղ երկիր է, որի բախտը, ըստ Յանիտսկիի, «չի բերում ագրեսիվ հարևանի հարցում»։
«Երբ ագրեսիվ հարևանը ատրճանակով փորձում է ներխուժել ձեր տուն, դուք ոստիկանություն եք կանչում։ Բայց մեր դեպքում ոստիկանությունը հրաժարվում է միջամտել։ 1994 թվականին Ուկրաինան հրաժարվեց իր միջուկային զենքից՝ ԱՄՆ-ի, Մեծ Բրիտանիայի և Ռուսաստանի անվտանգության երաշխիքների դիմաց: Ուստի այն, ինչ տեղի է ունենում այսօր, ոչ միայն Ռուսաստանի մեղքով է, ոչ միայն նրա գործողություններն են»,- ընդգծեց նա։
Հռիփսիմե Հովհաննիսյան
