Բաքվում ԱՄՆ նախկին դեսպանը ռուս-ադրբեջանական նոր հռչակագիրն անվանել է «Ադրբեջանի ինքնիշխանության հանձնման փաստաթուղթ»

Բաքվում ԱՄՆ նախկին դեսպան Ռիչարդ Կոզլարիչն ադրբեջանական «Թուրան» գործակալության հետ զրույցում մեկնաբանել է ՌԴ-ի և Ադրբեջանի միջև կնքված դաշնակցային նոր հռչակագիրը։
«Ես կարդացել եմ համաձայնագիրը, դա փաստաթուղթ է ինքնիշխանության հանձման մասին։ Ռուսաստանը կունենա մշտական ռազմական ներկայություն (արդեն ոչ ժամանակավոր խաղաղապահ ուժեր ) և վետոյի իրավունք Ադրբեջանի ու երրորդ երկրների հարաբերություններում»,- ասել է Կոզլարիչը։

Նա հիշեցրել է, որ Ադրբեջանի նախագահ Իլհամ Ալիևի այցը Մոսկվա կայացել է մի քանի ժամ անց այն բանից հետո, երբ Վլադիմիր Պուտինը ճանաչեց ինքնահռչակ Դոնեցկի ու Լուգանսկի հանրապետությունների անկախությունը։ Ամերիկացի դիվանագետն ասել է, որ այդ քայլը տեղի է ունենում այն ժամանակ, երբ եվրոպական երկրները դիտարկում են Ադրբեջանը որպես գազի կարևոր այլընտրանքային մատակարար։

Առայժմ Եվրոպայից և ԱՄՆ-ից պաշտոնական արձագանք չի եղել հռչակագրի ստորագրմանը։
Պատասխանելով հռչակագրի ստորագրման օրվա մասին հարցին՝ Կոզլարիչը նշել է․ «Պուտինին պետք են դաշնակիցներ, իսկ Ալիևը չի պատրաստվում հիասթափեցնել»։

Նա նաև ուշադրություն է հրավիրել այն փաստի վրա, որ Ալիևը ստորագրել է հռչակագիրն այն բանից հետո, երբ Ադրբեջանում հայտարարեցին, որ, իբր, երկրում «գունավոր հեղափոխություն» է նախապատրաստվում։

Ըստ Կոզլարիչի՝ Ալիևը հիասթափվել է ԱՄՆ-ից, երբ նրան չեն հրավիրել նախագահ Բայդենի «Հանուն ժողովրդավարության» գագաթնաժողովին։

Հիշեցնենք, որ նախօրեին Մոսկվայում ՌԴ-ի և Ադրբեջանի նախագահները ստորագրեցին երկու երկրների միջև դաշնակցային համագործակցության նոր հռչակագիրը։

Էմմա Չոբանյան