16.09.2026 | 19:50
Նիժնի Տապըռի գեղ եք ուզում, որ ոնց ուզեք՝ ձեր «Մայբախ»-ները քշեք. Փաշինյան
Պետդումայի պատգամավորը հույս ունի, որ ապագայում «Ղրղզստանը, Հայաստանն ու Ուկրաինան կմիանան Միութենական պետությանը»
Քաղաքականություն
21.02.2022 | 23:13
Ապագայում Ղրղզստանը, Հայաստանը և Ուկրաինան կարող են միանալ Ռուսաստանի ու Բելառուսի Միութենական պետությանը, որը կհանգեցնի նոր երկրի ստեղծման։ URA.ru-ի հետ զրույցում նման կարծիք է հայտնել ՌԴ Պետդումայի ԱՊՀ, եվրասիական ինտեգրման և հայրենակիցների հետ հարաբերությունների հանձնաժողովի նախագահ Լեոնիդ Կալաշնիկովը։
«Խորհրդային Միության փլուզումից հետո այդպես էլ մտածում էին, որ Ռուսաստանը, Բելառուսը, Ուկրաինան և Ղազախստանը, հնարավոր է՝ հաշվի առնելով, որ Ղազախստանի հետ մենք միշտ միասին ենք եղել, նրա տարածքները կցվել են Խորհրդային Միության ժամանակ։ Ուստի, ես հույս ունեմ, որ այդ երեք ժողովուրդների շուրջ էլ՝ Բելառուս, Ուկրաինա, Ռուսաստան, ձևավորվելու է այն միջուկը, որը ժամանակի ընթացքում կլինի ինչ-որ նոր պետություն։ Ես արդեն ասում եմ, որ Միութենական պետության հիման վրա կաճի մի բան, որը կկոչվի այլ պետություն»,- ասել է Կալաշնիկովը։
Նրա խոսքով՝ որոշ երկրներ իրենք են ցանկություն հայտնել մտնել Ռուսաստանի կազմ։
«Շատ պետություններ գնացել են դեպի Ռուսաստան։ Ի տարբերություն Անգլիայի՝ մենք չենք ունեցել երբևէ գաղութներ, մենք միշտ այդ առումով գնացել ու գրավել ենք մեր տարածքները՝ միացնելով ծայրամասերը։ Կարծում եմ, որ այս իրավիճակում, երբ խոսում եք ապագայի հեռանկարի մասին, դա կարող են լինել Ղրղզստանը, Հայաստանը, որոնք գիտակցում են, որ իրենց չի բավարարում անվտանգություն՝ սեփական գոյության համար»,- ասել է Լեոնիդ Կալաշնիկովը։
Ի դեպ, Կալաշնիկովը ՌԴ-ում ադրբեջանական լոբբիի ամենաակտիվ դեմքերից է և պարբերաբար հանդես է գալիս հակահայկական հայտարարություններով։
Էմմա Չոբանյան
