Քաղաքականություն
21.02.2022 | 13:57Ադրբեջանի պաշտպանության նախարարությունում շարունակվում են բարձրաստիճան պաշտոնյաների ձերբակալությունները։ Ադրբեջանական լրատվամիջոցների փոխանցմամբ՝ Զինվորական դատախազության ծանր հանցագործությունների հետաքննության վարչության աշխատակիցները ձերբակալել են Ադրբեջանի ՊՆ գնումների և մատակարարումների վարչության պետ, գնդապետ Մելիքմամեդ Գուրբանովին։
Նշվում է, որ Գուրբանովը մեղադրվում է պետությանը 3,5 մլն մանաթի նյութական վնաս պատճառելու մեջ։ Դատարանն առաջիկայում որոշում կկայացնի նրա նկատմամբ կալանք կիրառելու միջնորդության վերաբերյալ։
Հիշեցնենք, որ Բաքվի զինվորական դատարանն օրերս բավարարել էր հետաքննող մարմնի միջնորդությունը և 4 ամսով կալանավորել ռազմաօդային ուժերի ֆինանսական ծառայության նախկին ղեկավար, գնդապետ Ջալալ Քազիմովին։ Նա մեղադրվում է ավելի քան 1 մլն մանաթի յուրացման մեջ։
Ավելի վաղ էլ ձերբակալվել էին Ադրբեջանի ՊՆ ֆինանսական վարչության ղեկավար Ռաֆայել Խալիլովը, N զորամասի ֆինանսական բաժնի պետ Ֆազայիլ Ալիևը, ցամաքային զորքերի ֆինանսական վարչության պետ Բայրամ Բայրամովն ու ֆինանսական վարչության սպա Ալիզադե Վյուլալ Ադալեթ օղլուն։ Բաքվի զինվորական դատարանը նրանց նկատմամբ ևս խափանման միջոց էր ընտրել կալանավորումը։ Նրանք մեղադրվում են ավելի քան 10 մլն մանաթ յուրացնելու մեջ։
Էմմա Չոբանյան
