07.11.2024 | 14:17
Կիսո՞ւմ եք Փաշինյանի վարած քաղաքականությունն ամբողջ պատասխանատվությամբ. հարց նորանշանակ նախարարին․ ՏԵՍԱՆՅՈՒԹ
Միլիոնավոր բրիտանացիների խորհուրդ են տվել տանը մնալ հզոր «Յունիս» փոթորկի պատճառով
Քաղաքականություն
18.02.2022 | 20:35
Մեծ Բրիտանիային պատուհասել է «Յունիս» փոթորիկը, երկրում հայտարարվել է վտանգի կարմիր աստիճան։ Բրիտանական կղզիների միլիոնավոր բնակիչների խորհուրդ է տրվել չլքել տները` փոթորիկի պատճառով, որը վերջին տասնամյակների ընթացքում գրանցված ամենաուժեղներից է, գրում է BBC-ի ռուսական ծառայությունը:
Օդերևութաբանական ծառայությունը տագնապի ամենաբարձր` կարմիր մակարդակ է հայտարարել Լոնդոնում, Անգլիայի հարավ-արևելքում և արևելքում: Եղանակային վտանգի կարմիր մակարդակն արդեն գործում է հարավ-արևմտյան Անգլիայի և հարավային Ուելսի տարածքում։
Այսօր հարյուրավոր դպրոցներ փակվել են, Ուելսում երկաթուղային հաղորդակցությունը դադարեցվել է, զինվորականները բարձր պատրաստվածության վիճակում են։
«Յունիս» փոթորիկի անցման ժամանակ քամիները կարող են հասնել ժամում 145 կիլոմետրի, ինչը սպառնում է լուրջ ավերածություններով և էլեկտրաէներգիայի անջատումներով, զգուշացնում են կանխատեսողները։ «Յունիսը» Բրիտանիայում մեկ շաբաթվա ընթացքում գրանցված երկրորդ խոշոր փոթորիկն է: Ավելի վաղ «Դադլի» փոթորիկը հարվածել էր Շոտլանդիայի, հյուսիսային Անգլիայի և Հյուսիսային Իռլանդիայի շրջաններին՝ հազարավոր տներ թողնելով առանց էլեկտրականության:
Եղանակի կարմիր մակարդակ հազվադեպ է հայտարարվում: Նման նախազգուշացումը նշանակում է, որ մարդկանց կյանքին վտանգ է սպառնում․ քամին կարող է քշել տների տանիքներ, քանդել էլեկտրահաղորդման գծեր և արմատախիլ անել ծառերը:
Տաթև Ֆռանգյան
