18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
ՆԱՏՕ-ի դաշնակիցները սերտորեն համագործակցում են Վրաստանի և Ուկրաինայի հետ. Ստոլտենբերգ
Քաղաքականություն
17.02.2022 | 22:48
ՆԱՏՕ-ն շարունակում է աջակցել Վրաստանին և Ուկրաինային՝ հաղթահարելու Ռուսաստանի կողմից եվրատլանտյան տարածաշրջանին սպառնացող վտանգները։ Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը՝ Վրաստանի և Ուկրաինայի պաշտպանության նախարարների մասնակցությամբ Բրյուսելում կայանալիք հանդիպումից առաջ, փոխանցում է Aliq media-ն։
Ստոլտենբերգի խոսքով՝ ՆԱՏՕ-ի դաշնակիցները սերտորեն համագործակցում են Վրաստանի և Ուկրաինայի հետ։
«Խաղաղությունն ու կայունությունը եվրատլանտյան տարածաշրջանում այսօր վտանգված են: Մոսկվայից ազդանշաններ են գալիս, որ դիվանագիտությունը կարող է շարունակվել։ Մինչ այժմ, սակայն, մենք դուրս գալու կամ դեէսկալացիայի նշաններ չենք տեսել։ Ռուսաստանը ևս մեկ անգամ ցույց տվեց եվրոպական անվտանգության հիմքում ընկած սկզբունքների խախտում, ինչպես նաև ցուցադրեց ուժի կիրառման սպառնալիքն օգտագործելու իր կարողությունն ու պատրաստակամությունը։ Ցավոք սրտի, ես վախենում եմ, որ սա նոր նորմ է, որին պետք է պատրաստ լինել», — ասել է Յենս Ստոլտենբերգը պաշտպանության նախարարների դռնփակ հանդիպմանն ընդառաջ բացման խոսքում։
Ըստ Ստոլտենբերգի՝ ՆԱՏՕ-ի դաշնակիցներն անխոնջ ջանքեր են գործադրում քաղաքական և դիվանագիտական լուծումների հասնելու համար.
«Մենք դա արել ենք սերտ համակարգելով ինչպես Վրաստանի, այնպես էլ Ուկրաինայի հետ։ ՆԱՏՕ-ի հզոր քաղաքական և գործնական աջակցությունը ինչպես Վրաստանին, այնպես էլ Ուկրաինային շարունակվում է»։
Ավելի վաղ Վրաստանի պաշտպանության նախարարը հանդիպել է դաշինքի ռազմական կոմիտեի նախագահ, ծովակալ Ռոբ Բաուերին։
«ՆԱՏՕ-ի նախարարական հանդիպման շրջանակներում մենք անհատական հանդիպումներ ենք անցկացրել իմ գործընկերների, ինչպես նաև ՆԱՏՕ-ի ռազմական կոմիտեի նախագահի հետ։ Նա ՆԱՏՕ-ի առաջին զինվորականն է, Վրաստանի մեծ բարեկամն է, մենք խոսել ենք մեր ռազմավարական ծրագրերի, մեր ապագայի մասին և, իհարկե, միասնական ենք բոլոր սկզբունքային հարցերում», — ասել է Բուրճուլաձեն։
Բուրճուլաձեի խոսքով՝ ինչպես ՆԱՏՕ-ն հետ չի կանգնի իր նպատակներից ու որոշումներից, այնպես Վրաստանը հետ չի կանգնի եվրոպական ընտանիքի լիիրավ անդամ դառնալու վճռականությունից։
Ըստ պաշտպանության նախարարության, հանդիպմանը քննարկվել են ՆԱՏՕ-ի և Վրաստանի միջև ռազմական համագործակցության հարցերը, այդ թվում՝ մարտին նախատեսված ՆԱՏՕ-Վրաստան զորավարժությունները, որոնք Վրաստանը կհյուրընկալի արդեն երրորդ անգամ։
