14.09.2026 | 09:45
Արտարժույթների փոխարժեքները՝ սեպտեմբերի 14-ի դրությամբ
Ռազմական սցենարն Ուկրաինայի շուրջ վտանգավոր է մեր ռեգիոնի համար․ Արմեն Գրիգորյան. ՏԵՍԱՆՅՈՒԹ
Քաղաքականություն
14.02.2022 | 20:02
Ուկրաինայի շուրջ զարգացումները մտահոգիչ են Հայաստանի համար։ Ցանկացած միջազգային լարում և բախում նախադեպեր ու խնդիրներ է ստեղծում միջազգային հարաբերություններում, բայց նաև այն կոնտեքստում, որ Ուկրաինայի շուրջ հնարավոր ռազմական զարգացումները բացասական են ազդելու մեր տարածաշրջանի վրա։ Factor TV-ի հետ զրույցում այսպիսի գնահատական է հնչեցնում ՀՀ Անվտանգության խորհրդի քարտուղար Արմեն Գրիգորյանը Ռուսաստան-Ուկրաինա սահմանին հավանական սրացումների վերաբերյալ։
Ըստ որոշ գնահատականների՝ «սառը պատերազմից» հետո առաջին անգամ Ռուսաստանի և ԱՄՆ-ի միջև լարվածության ամենաբարձր աստիճանն է։ Մի քանի տասնյակ երկրներ իրենց քաղաքացիներին կոչ են անում հեռանալ Ուկրաինայից, տարհանում են դիվանագիտական առաքելությունները՝ ահազանգելով, որ ՌԴ-ն կարող է հարձակում գործել Ուկրաինայի վրա։ Ըստ ԱՄՆ պետքարտուղարի՝ կարող է ներխուժում սկսվել ցանկացած պահի, ռուսական կողմը հերքում է հարձակվելու մտադրությունը։
Հայաստանի Անվտանգության խորհրդի քարտուղարը մանրամասնեց, թե ինչպես կարող է ուկրաինական ուղղությամբ հնարավոր պատերազմը բացասական հետևանքներ ունենալ ՀՀ-ի վրա՝ անվտանգային առումով․ «Միջազգային հանրության ուշադրությունը հնարավոր է կենտրոնանա Ուկրաինայի վրա, և մեր տարածաշրջանում որոշ ուժեր փորձեն ռազմական ճանապարհով խնդիրներ լուծել։ Այս հարցը մենք, բնականաբար, քննարկել ենք մեր բոլոր գործընկերների հետ՝ ինչպես ՌԴ-ի, այնպես էլ՝ արևմտյան։ Մենք հավաստիացում ենք ստացել մեր գործընկերներից, որ մեր տարածաշրջանը շարունակելու է ուշադրության կենտրոնում մնալ»։
ԱԽ քարտուղարը հույս է հայտնում, որ դիվանագիտական ճանապարհով լուծումներ կգտնվեն Եվրոպայի անվտանգային ճարտարապետության շուրջ։ Վատագույն սցենարի դեպքում Հայաստանը հույս ունի, որ միջազգային գործընկերները կշարունակեն ուշադրության տակ պահել տարածաշրջանը։
Մանրամասները՝ տեսանյութում։
Ռոբերտ Անանյան
