09.02.2026 | 23:09
V-BAT հետախուզական ԱԹՍ-ը՝ Հայաստանում. Պապիկյանը՝ ՀՀ-ԱՄՆ համագործակցության մեկնարկի մասին
Զելենսկին և Բայդենն այսօր կքննարկեն անվտանգության և ապաէսկալացիայի հետ կապված իրադրությունը
Քաղաքականություն
13.02.2022 | 19:59
Ուկրաինայի և Միացյալ Նահանգների նախագահներ Վլադիմիր Զելենսկին և Ջո Բայդենն առաջիկա ժամերին կքննարկեն անվտանգության իրավիճակը և լարվածության թուլացումը։ ТАСС-ի հաղորդմամբ՝ այս մասին կիրակի օրը հայտարարել է Ուկրաինայի նախագահի մամուլի քարտուղար Սերգեյ Նիկիֆորովը։
«Առաջիկա ժամերին Ուկրաինայի նախագահ Վլադիմիր Զելենսկին ԱՄՆ նախագահ Ջո Բայդենի հետ կքննարկի անվտանգության իրավիճակը և շարունակվող դիվանագիտական ապաէսկալացիոն ջանքերը»,- գրել է Նիկիֆորովը Facebook-ում։
Ինչպես Twitter-ում Երևանի ժամանակով ժամը 18:43-ին հաղորդել է Bloomberg-ի լրագրող Ջենիֆեր Ջեյքոբսը, վկայակոչելով երկու երկրների պաշտոնյաներին, ԱՄՆ-ի և Ուկրաինայի ղեկավարների զրույցը տեղի կունենա «մոտ մեկ ժամից»:
Սա կլինի երկու առաջնորդների երրորդ խոսակցությունը տարվա սկզբից. Զելենսկին և Բայդենը հեռախոսազրույցներ են ունեցել հունվարի սկզբին և վերջին։
Ավելի վաղ Զելենսկին հույս էր հայտնել, որ Միացյալ Նահանգները հետագա քայլեր կձեռնարկի պաշտպանական ոլորտում համագործակցության ամրապնդման և Ուկրաինայի պաշտպանունակությունն ուժեղացնելու համար։ Նա հայտարարել է, որ կողջունի Ուկրաինա-Ռուսաստան-ԱՄՆ ձևաչափով բանակցային հարթակի ստեղծումը։ Միաժամանակ նա չի կարծում, որ այդ հարթակը պետք է առաջնահերթություն լինի նորմանդական ձևաչափի նկատմամբ (Գերմանիա, Ռուսաստան, Ֆրանսիա, Ուկրաինա)։
