16.09.2026 | 19:25
Կախած վիճակում կոշիկդ հանելու եմ. Փաշինյանը` Լևոն Քոչարյանին. ՏԵՍԱՆՅՈՒԹ
Մակրոնը Բայդենին պատմել է Մոսկվա և Կիև կատարած իր այցերի մասին
Քաղաքականություն
10.02.2022 | 15:45
Ֆրանսիայի և Միացյալ Նահանգների նախագահներ Էմանուել Մակրոնը և Ջո Բայդենը բանակցություններ են վարել Ֆրանսիայի ղեկավարի Ռուսաստան և Ուկրաինա կատարած այցերից հետո։ Այս մասին հայտնում է Սպիտակ տան մամուլի ծառայությունը։
«Քննարկել են նախագահ Մակրոնի վերջին հանդիպումները Ռուսաստանում և Ուկրաինայում: Նրանք նաև խոսել են շարունակական դիվանագիտական և զսպման ջանքերի մասին, որոնք ձեռնարկվում են մեր դաշնակիցների և գործընկերների հետ սերտ համագործակցությամբ` ի պատասխան Ուկրաինայի սահմանների մոտ Ռուսաստանի շարունակվող ռազմական կուտակումների», – ասվում է հայտարարության մեջ:
ԱՄՆ վարչակազմի խոսնակ Ջեն Փսակին նույնպես ճեպազրույցում ասել է, որ այս շաբաթվա ընթացքում Բայդենը կզրուցի մի շարք այլ եվրոպացի գործընկերների հետ։ Միաժամանակ նա ասել է, որ Վաշինգտոնը դեռ չի որոշել՝ որքանով են հաջողվել Մակրոնի այցերը Մոսկվա և Կիև, սակայն ԱՄՆ իշխանությունները նշում են, որ Ռուսաստանը ոչ մի քայլ չի ձեռնարկում լարվածության թուլացման համար։
Փսակին նաև տեղեկացրել է, որ Ռուսաստանի և Բելառուսի կողմից զորավարժությունների անցկացումը ԱՄՆ-ը համարում է Ուկրաինայի շուրջ իրավիճակի սրմանն ուղղված գործողություններ։
«Դա, իհարկե, անհանգստացնում է մեզ, բայց ես չեմ կանխատեսի, թե դա ինչ է նշանակում ներխուժման առումով», – ասել է նա:
Հիշեցնենք, որ Ֆրանսիայի նախագահի այցը Ուկրաինա 24 տարվա մեջ առաջին անգամ տեղի է ունեցել փետրվարի 8-ին՝ Մոսկվայում ՌԴ առաջնորդ Վլադիմիր Պուտինի հետ բանակցությունների հաջորդ օրը։
Ֆրանսիայի նախագահի խոսքով՝ Մոսկվայում նա հասել է Ուկրաինայի շուրջ ճգնաժամի դեէսկալացիային։
Տաթև Ֆռանգյան
