Լարված իրավիճակ Վարդենիսում․Ահարոն Խաչատրյանի կողմնակիցները փակել էին ճանապարհը

Այսօր առավոտից Վարդենիսում, Ծովագյուղի հատվածում, տեղի բնակիչները փակել էին ճանապարհը՝ պահանջելով նորընտիր քաղաքապետ Ահարոն Խաչատրյանին փոխանցել համայնքապետարանի բանալիներն ու կնիքը։

Առավոտյան կայացած ավագանու նիստից հետո, որին ներկա չեն գտնվել ՔՊ անդամները, աշխատակազմի քարտուղարը հրաժարվել է հանձնել կնիքն ու բանալիները՝ նշելով, որ ինքը չունի այդ իրավասությունը և որ պետք է դիմել Գեղարքունիքի մարզպետարան, իսկ մարզպետարանից էլ գրավոր դիմում եմ պահանջել։ Դրանից հետո համայնքապետարանի բակում հավաքված քաղաքացիները փակել են ճանապարհը։

Գեղարքունիքի մարզային ոստիկանապետը հորդորել է բացել ճանապարհը, սակայն քաղաքացիները չեն համաձայնել՝ հիշեցնելով հեղափոխությունից առաջ Նիկոլ Փաշինյանի գործողությունները։

Հիշեցնենք, որ 2021թ-ի դեկտեմբերի 25-ին կայացած ՏԻՄ ընտրությունների ժամանակ 13 մանդատ ստացել էր ՔՊ-ն և 14 մանդատ՝ «Ահարոն Խաչատրյան», «Միասնական Վարդենիս» խմբակցությունները, որոնք դեկտեմբերի 30-ին կայացած նիստի ժամանակ քաղաքապետ են ընտրել Ահարոն Խաչատրյանին։ Քվեարկության ժամանակ, սակայն, նիստին ներկա չեն եղել ՔՊ անդամները և ընտրությունը անվավեր ճանաչելու պահանջով դիմել են դատարան։ Փետրվարի 2-ին դատարանը բավարարել է «Քաղաքացիական պայմանագիր» խմբակցության ավագանու անդամների հայցը և անվավեր ճանաչել Գեղարքունիքի մարզի Վարդենիս խոշորացված համայնքի ավագանու որոշումը, որի համաձայն՝ Ահարոն Խաչատրյանն ընտրվել էր համայնքապետ։ Դատական ակտի համաձայն՝ ավագանու նոր նիստ պետք է լինի։ Որոշումն ուժի մեջ կմտնի 1 ամսից։

Ահարոն Խաչատրյան» դաշինքի անդամ Կարեն Մկրտչյանը լրագրողների հետ զրույցում ասել է, որ որոշումը չեն բողոքարկի, եթե վստահ լինեն, որ հաջորդ նիստը նախորդի ճակատագրին չի արժանանա և կկայանա, իսկ մինչ այդ քանի դեռ որոշումը ուժի մեջ չի մտել, պահանջում են, որ թույլ տան՝ ընտրված համայնքապետն իրականացնի իր աշխատանքը։

Ահարոն Խաչատրյանը հայտնել է, որ մարզպետարանի հետ ունի պայմանավորվածություն, որ 10-օրյա ժամկետում խնդրին լուծում կտրվի, ինչից հետո ճանապարհը բացվել է։

Սաթենիկ Հայրապետյան