19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
ԱՀԿ-ն կոչ է անում աշխարհին` չհանել դիմակները
Քաղաքականություն
02.02.2022 | 23:30
Եվրոպայի ավելի ու ավելի շատ երկրներ վերացնում կամ մեղմացնում են սանիտարական սահմանափակումները՝ կորոնավիրուսի «օմիկրոն» շտամի արագ տարածման ֆոնին, որը չափազանց վարակիչ է, սակայն անվտանգ ճնշող մեծամասնության համար: Սա միտում է, որը լրջորեն անհանգստացնում է Առողջապահության համաշխարհային կազմակերպությանը (ԱՀԿ), քանի որ չի բացառվում վիրուսի հետագա մուտացիան, հաղորդում է Euronews-ը։
«Մենք կոչ ենք անում բոլոր երկրներին պաշտպանել իրենց բնակչությանը՝ օգտագործելով զինանոցում առկա միջոցները, և դա միայն պատվաստանյութերը չեն։ Դեռ վաղ է ցանկացած պետության համար հաղթանակ հռչակելը։ Այս վիրուսը վտանգավոր է, այն շարունակում է զարգանալ մեր աչքի առաջ»,- ասել է ԱՀԿ գլխավոր քարտուղար Թեդրոս Ադհանոմ Գեբրեյեսուսը։
Դանիան Եվրամիության առաջին երկրներից էր, որը փետրվարին հանել է բոլոր սահմանափակումները, և COVID-ը ճանաչել որպես հիվանդություն, որը կրիտիկական վտանգ չի ներկայացնում հասարակության համար:
Իշխանությունները նշում են, որ վարակվածության բարձր մակարդակը չի ուղեկցվում հոսպիտալացումների աճով՝ հաշվի առնելով պատվաստվածների և բուստերային պատվաստումների բարձր տոկոսը։ Առանց դիմակների կրկին շփվելու հնարավորությունը հուսադրող է, բայց նաև մի փոքր վախեցնող։
«Սա հիանալի նորություն է, բայց ես մի փոքր վախենում եմ։ Տնից դուրս գալուց առաջ ես պայուսակիս մեջ դիմակ եմ դնում, եթե շատ մարդաշատ տեղ եմ մտնում, մտածում եմ, որ կկրեմ այն։ Կորոնավիրուսը դեռ չի անհետացել, բայց ազատության զգացումը, իհարկե, հրաշալի է»,- ասում է Կոպենհագենի 60-ամյա բնակչուհին։
Նույն ճանապարհով է գնում նաև Նորվեգիան՝ վերացնելով պարտադիր հեռավար աշխատանքը և մարդաշատ հաստատություններ այցելելու սահմանափակումները։
Ֆրանսիան ևս վերացնում է սպորտային մրցույթներին, համերգներին հանրության մուտքի սահմանափակումները և փողոցում դիմակ կրելու պահանջը: Այս բոլոր մեղմացումները նախատեսված են միայն պատվաստված քաղաքացիների համար, քանի որ չպատվաստված մեծահասակներին արգելվում է մուտք գործել պետական հաստատություններ:
Տաթև Ֆռանգյան
