Ադրբեջանը ձգտում է իր ռազմաօդային ուժերը համալրել թուրքական արտադրության ինքնաթիռներով․ վերլուծաբան

Բաքուն կարող է ձգտել ընդլայնել իր ռազմաօդային ուժերի փոքր ինքնաթիռները հարևան Թուրքիայից և Վրաստանից ձեռքբերումներով։ Այս մասին գրում է վերլուծաբան Փոլ Իդդոնը, փոխանցում է «Ահվալ» գործակալությունը։

Ադրբեջանը, որի ռազմաօդային ուժերը կազմված են ռուսական արտադրության տասնյակ ՄիԳ-29 կործանիչներից և Սու-25 գրոհային ինքնաթիռներից, հնարավոր է՝ փնտրում են ուսուցողական ինքնաթիռներ, որոնք կարող են օգտագործվել նաև որպես թեթև հարձակման ինքնաթիռներ։ Ըստ վերլուծաբանի՝ թուրքական արտադրության երկտեղանոց TAI Hürkuş-ը հնարավոր տարբերակ կարող է լինել։

Հեղինակը գրում է, որ Թուրքիայի և Ադրբեջանի հարաբերությունները հասել են պատմական գագաթնակետին։ Արցախյան 44-օրյա պատերազմում էլ Թուրքիայի ռազմական աջակցությունը վճռորոշ նշանակություն ունեցավ։ Իդդոնը նաև հիշեցնում է, որ Թուրքիայի և Ադրբեջանի նախագահները ստորագրել են Շուշիի հռչակագիրը, որը նախատեսում էր երկրների միջև քաղաքական, տնտեսական և պաշտպանական կապերի ընդլայնում։

«Ադրբեջանը կարող է փնտրել նաև Hürjet-ը, երբ այն դուրս գա արտադրության գծից, որպեսզի ուժեղացնի իր օդուժը, պատրաստի նոր օդաչուների, իսկ գործող օդաչուներին լրացուցիչ թռիչքի ժամանակ տրամադրի»,- գրում է Իդդոնը՝ նշելով, որ Բաքուն կարող է դիտարկել նաև թուրքական մեկ այլ՝ TAI Hürjet ինքնաթիռը։

Թուրքիան Բաքվին օգնում է նաև արդիականացնել իր Frogfoots-ը, որպեսզի դրանք համատեղելի լինեն թուրքական և տեղական արտադրության սպառազինությունների հետ, այդ թվում՝ Թուրքիայի SOM հրթիռները, որոնց հեռահարությունը 150 մղոն է։

Իդդոնը հավելում է, որ Ադրբեջանի քայլերը կարող են նաև ոգեշնչված լինել Հայաստանից, որը ձեռնամուխ է եղել իր օդուժի արդիականացմանը՝ Ռուսաստանից գնելով Սու-30 ՍՄ բազմաֆունկցիոնալ կործանիչներ, որոնք նույնիսկ չեն էլ օգտագործվել Արցախյան 44-օրյա պատերազմում, չնայած Երևանի զինանոցում եղած ամենամարտունակ և առաջադեմ կործանիչներն են։

Էմմա Չոբանյան