16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
ՄԻԵԴ-ը որոշել է, որ Թուրքիան խախտել է 40 ընդդիմադիր պատգամավորի իրավունքները՝ նրանց զրկելով անձեռնմխելիությունից
Քաղաքականություն
01.02.2022 | 18:54
Մարդու իրավունքների եվրոպական դատարանը (ՄԻԵԴ) հայտարարել է, որ Թուրքիայի քրդամետ Ժողովուրդների դեմոկրատական կուսակցության (HDP) 40 պատգամավորների անձեռնմխելիությունից զրկելը և 2016 թվականի մայիսի 20-ին նրանց դատավարությունը Սահմանադրության և խոսքի ազատության խախտում է։ Այս մասին հաղորդում է Duvar-ը։
Կուսակցության նախկին ղեկավար Սելահեթթին Դեմիրթաշի փաստաբան Մահսունի Քարամանը նշել է, որ այս որոշման համաձայն՝ HDP-ի բոլոր բանտարկված պատգամավորները, այդ թվում՝ նախկին համանախագահներ Դեմիրթաշը և Ֆիգեն Յուքսեքդաղը, պետք է ազատ արձակվեն, և բոլորի պարագայում անհրաժեշտ է դատավարության գործընթաց վերսկսել։
HDP-ի նախագահ Միթհաթ Սանջարը մեկնաբանել է ՄԻԵԴ-ի որոշումը՝ ասելով, որ Թուրքիայի կառավարությունը պետք է անհապաղ դադարեցնի HDP-ի գործիչների դեմ դատական գործընթացները և ազատ արձակի նրանց։
«ՄԻԵԴ-ն ասում է, որ անձեռնմխելիությունից զրկելն անօրինական է և քաղաքական խտրականություն: Այս իշխանությունը խախտում է Սահմանադրությունը»,- ասել է Սանջարը իր կուսակցության խորհրդարանական խմբի հետ հանդիպմանը։
Դեմիրթաշը, Յուքսեքդաղը և HDP-ի մի շարք այլ պատգամավորներ ձերբակալվել են 2016 թվականի նոյեմբերի 4-ին Քուրդիստանի աշխատավորական կուսակցության (PKK) հետ կապված լինելու մեղադրանքով։ Դրանից ի վեր իշխող «Արդարություն և զարգացում» կուսակցությունը մեծացրել է ճնշումը HDP-ի դեմ՝ ձգտելով անգամ հասնել կուսակցության փակմանը։
Էմմա Չոբանյան
