16.09.2026 | 20:30
ՌԴ-ն նոր պատժամիջոցներ կկիրառի՝ հենց ՀՀ-ն որոշի ռազմաբազան հեռացնել․ Դավիթ Կարապետյան․ ՏԵՍԱՆՅՈՒԹ
Նազարբաևը հեռացավ Ղազախստանի իշխող կուսակցության ղեկավարի պաշտոնից․ նոր նախագահ է ընտրվել Տոկաևը
Քաղաքականություն
28.01.2022 | 16:06
Ղազախստանի իշխող «Նուր Օթան»-ի համագումարի մասնակիցները երկրի նախագահ Կասիմ-Ժոմարտ Տոկաևին ընտրել են կուսակցության նախագահ։ Այս մասին հայտնել է Տոկաևի մամուլի ծառայությունը, գրում է ՏԱՍՍ-ը։
«Կուսակցության արտահերթ՝ 21-րդ համագումարի որոշմամբ՝ միաձայն «Նուր Օթան» կուսակցության նախագահ է ընտրվել Ղազախստանի Հանրապետության նախագահ Կասիմ-Ժոմարտ Տոկաևը»,- ասվում է թվիթերում նախագահի մամուլի ծառայության տարածած հաղորդագրության մեջ։
Նշվում է, որ Տոկաևի թեկնածությունն այդ պաշտոնում առաջարկել է Ղազախստանի առաջին նախագահը, որը մինչ օրս զբաղեցնում էր իշխող կուսակցության ղեկավարի պաշտոնը։ Օրակարգի համաձայն՝ նիստում նաև քննարկվելու է կուսակցության կանոնադրության և քաղխորհրդի փոփոխությունները։
Ղազախստանի իշխող կուսակցության արտահերթ համագումարն աշխատանքները սկսել է երկրի ղեկավար կազմի մասնակցությամբ՝ առցանց ձևաչափով։ Նշվում է, որ համագումարին տեսակապի միջոցով մասնակցում են երկրի ղեկավարությունը, քաղխորհրդի անդամները, մարզային թևերի ներկայացուցիչներ, պատգամավորներ, կառավարության անդամներ։
Նազարբաևի՝ կուսակցության ղեկավարման լիազորությունները Տոկաևին փոխանցելու որոշման մասին հայտնի էր դարձել դեռևս 2021-ի նոյեմբերի 23-ին, «Նուր Օթան»-ի քաղխորհրդի ընդլայնված կազմով նիստից հետո։
Էմմա Չոբանյան
