18.12.2025 | 22:20
Վթար Ներքին Դվին գյուղում․ կան տուժածներ
Ղազախստանի խորհրդարանը Նազարբաևին զրկել է Ժողովրդական ժողովում և Անվտանգության խորհրդում ցմահ նախագահությունից
Քաղաքականություն
27.01.2022 | 16:16
Ղազախստանի նախկին նախագահ Նուրսուլթան Նազարբաևի ցմահ նախագահությունը Ղազախստանի Ժողովրդական ժողովում և Անվտանգության խորհրդում չեղարկվել է։ Համապատասխան օրենսդրական փոփոխությունները հաստատվել են խորհրդարանի Սենատի լիագումար նիստում, գրում է «Ռեալնօե վրեմյան»։
Ավելի վաղ այս փոփոխությունները հաստատվել էին Մաժելիսի (ստորին պալատի) լիագումար նիստում։ Փոփոխություններն ուղղված են Ժողովրդական ժողովի նախագահի և Անվտանգության խորհրդի նախագահի լիազորությունները երկրի նախագահին փոխանցելուն։ Ժողովրդական ժողովի մասին օրենքը բացառում է Ղազախստանի առաջին նախագահի՝ Էլբասի (ազգի առաջնորդի) այն ղեկավարելու ցմահ իրավունքը, իսկ Անվտանգության խորհրդի մասին օրենքը բացառում է Անվտանգության խորհուրդը ղեկավարելու ցմահ իրավունքը։
Քննարկվում են սահմանադրական օրենքներում փոփոխությունները և լրացումները, որոնք կպահպանեն Նազարբաևի՝ հանրապետության Սահմանադրական խորհրդի անդամ լինելու, կառավարությունում և խորհրդարանում ելույթ ունենալու իրավունքը։
Հիշեցնենք, որ Նազարբաևը Ղազախստանի նախագահի պաշտոնը զբաղեցրել է մոտ 30 տարի։ Նա նախագահի պաշտոնից հրաժարական տվեց 2019 թվականի մարտի 20-ին, սակայն պահպանեց Անվտանգության խորհրդի ղեկավարի, իշխանական «Նուր Օթան» կուսակցության առաջնորդի և Ղազախստանի Ժողովրդական ժողովի ղեկավարի պաշտոնները։
Տաթև Ֆռանգյան
