17.12.2025 | 13:16
Բեռլիոզի «Ռեքվիեմ»-ը՝ Հայաստանի ազգային ակադեմիական երգչախմբի կատարմամբ
Ալեքսեյ Նավալնիի եղբոր նկատմամբ հետախուզում է հայտարարվել
Քաղաքականություն
26.01.2022 | 13:54
Ռուս ընդդիմադիր գործիչ Ալեքսեյ Նավալնիի եղբայր Օլեգ Նավալնիի նկատմամբ հետախուզում է հայտարարվել։ BBC-ի ռուսական ծառայության հաղորդմամբ՝ այս մասին տեղեկացվում է ՌԴ ՆԳՆ տվյալների բազայում։
Ռուսաստանի Դաշնային քրեակատարողական ծառայությունը (ФСИН) նախօրեին պահանջել էր նրա պայմանական ազատազրկումը փոխարինել իրականով։ Ընդդիմադիր գործչի եղբայրն օգոստոսին դատապարտվել էր «սանիտարական գործով»։ Տեղեկացվում է, որ հետախուզումը կապված է քրեական գործի հետ, սակայն չի նշվում, թե կոնկրետ որ գործի մասին է խոսքը։
Օլեգ Նավալնիի փաստաբան Նիկոս Պարասկևովը «Ինտերֆաքս»-ին հայտնել է, որ հետախուզման մեջ գտնվող անձանց տվյալների բազայում հայտնվելու պատճառը քրեական ուղղիչ տեսչության կողմից իրականացված ստուգման ժամանակ նրա՝ բնակության վայրից բացակայությունն է։
«Ըստ հաղորդագրության՝ Նավալնին իսկապես չի գրանցվել, իսկ հետախուզման մեջ է հայտնվել այն պատճառով, որ տեսչությունն այցելել է նրա բնակության վայր և, ըստ երևույթին, նրան այնտեղ չի գտել»,- ասել է փաստաբանը։
Երեքշաբթի հայտնի դարձավ, որ քրեական ուղղիչ տեսչությունը դիմել է դատարան՝ «սանիտարական գործով» Նավալնիի պայմանական ազատազրկումը փոխելու միջնորդությամբ։
«Լյուբլինսկի շրջանային դատարանը նյութեր է ստացել Նավալնի Օլեգ Անատոլևիչի նկատմամբ կիրառված պայմանական պատիժը վերացնելու մասին»,- ասվում է դատարանի մամուլի ծառայության հաղորդագրության մեջ։
Դատարանի կայքում տեղադրված գործի քարտում նշվում է, որ միջնորդությունը ներկայացվել է «իր վրա դրված պարտականությունները չկատարելու, վնասի հատուցումից խուսափելու կամ նոր հանցագործություն կատարելու կապակցությամբ»։
