29.04.2024 | 19:46
ՀՀ նախագահն ընդունել է Գնել Սանոսյանին
Գյումրեցի Ավետիսյանների սպանությունից 7 տարի անց․ գործը դեռ Եվրադատարանում է
Հասարակություն
12.01.2022 | 22:20
7 տարի առաջ այս օրը Գյումրու Մյասնիկյան 188 հասցեում իրենց իսկ տանը սպանված Ավետիսյանների իրավահաջորդի ներկայացուցիչ, Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը մեզ հետ զրույցում ասաց, որ սպասում են Եվրոպական դատարանի վճռին։
«Մենք՝ որպես Ավետիսյանների հարսի և երեխաների իրավահաջորդի ներկայացուցիչ դիմել էինք Եվրոպական դատարան՝ կյանքի իրավունքի խախտման փաստով ոչ արդյունավետ քննություն իրականացնելու հիմքով։ Դիմում ենք ուղակել, սակայն որևէ նորություն չկա», -ասաց Արթուր Սաքունցը։
Նա նշեց, որ Ավետիսյանների 7 հոգանոց ընտանիքի սպանության մեջ մեղադրված ռուս զինծառայող Վալերի Պերմյակովից որևէ տեղեկություն չունեն, չգիտեն՝ որտեղ է կրում պատիժը։
«Մենք մի անգամ դիմել էինք, ոչինչ չէին ասում, հայտնի չէ՝ պատիժ կրո՞ւմ է, չի՞ կրում, ողջ է, թե ոչ, ոչ մի բանից տեղյակ չենք, նրան տեղափոխեցին Ռուսաստան, միայն այսքանը գիտենք»,-ասաց Արթուր Սաքունցը։
Նա նշեց, որ Ավետիսյանների սպանությունը չբացահայտված է․ օբյեկտիվ, բազմակողմանի քննություն չի ընթացել, չի բացահայտվել իրական հանցագործություն կատարած անձը և շարժառիթը։
«Եթե շարժառիթը բացահայտված չէ, չի կարող հանցագործությունը համարվել բացահայտված»,- ասաց Արթուր Սաքունցը։
Հիշեցնենք, որ Գյումրու Արցախ թաղամասի Մյասնիկյան փողոցի 188 տանը բնակվող Ավետիսյանների 7 հոգանոց ընտանիքի սպանությունը տեղի էր ունեցել 2015 թվականի հունվարի 12-ի լուսադեմին։ Սպանվել էին Սերյոժա և Հասմիկ Ավետիսյանները, նրանց դուստրը՝ Աիդա Ավետիսյանը, որդին՝ Արմեն Ավետիսյանը, հարսը՝ Արաքսյա Ավետիսյանը և երկու մանկահասակ երեխաները՝ Հասմիկ և Սերյոժա Ավետիսյանները։
Նրանց սպանության մեջ մեղավոր ճանաչվեց ռուսական 102-րդ ռազմաբազայի զինծառայող Վալերի Պերմյակովը։ Շիրակի մարզի ընդհանուր իրավասության դատարանը 2016 թվականի օգոստոսի 23-ին նրան դատապարեց ցմահ ազատազրկման՝ մեղավոր ճանաչելով Ավետիսյանների 7 հոգանոց ընտանիքի սպանության, ավազակային հարձակման և հայ-թուրքական սահմանը հատելու փորձի մեջ։ Ամբողջ դատավարությունն ընթացավ ռուսական ռազմաբազայի տարածքում, իսկ վճռի հրապարակումից հետո Պերմյակովին տեղափոխեցին ՌԴ։ Ըստ ՌԴ արդարադատության նախարարության տեղեկատվության,՝ նա պատիժը կրում է ՌԴ-ի Յամալո-Նենեցկի ինքնավար մարզի թիվ 8 ուղղիչ գաղութում՝ հատուկ պահման ռեժիմում։
Արմիկ Մովսիսյան
