19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Լռությունը խախտվեց․ պաշտոնական Բաքուն առաջին անգամ մեկնաբանել է Ղազախստանում տիրող իրադարձությունները
Քաղաքականություն
11.01.2022 | 14:52
Պաշտոնական Բաքուն առաջին անգամ արձագանքել է Ղազախստանի իրադարձություններին։ Ադրբեջանի ԱԳ նախարար Ջեյհուն Բայրամովը Թյուրքական պետությունների կազմակերպության ԱԳՆ-ի խորհրդի արտահերթ նիստին ունեցած ելույթում անդրադարձել է ղազախստանյան իրադարձություններին։ Նա նշել է, որ Ադրբեջանը աջակցում է Ղազախստանում իրավիճակի շուտափույթ կարգավորմանն ու օրենքի գերակայության վերականգնմանը, գրում են ադրբեջանական լրատվամիջոցները։
«Ադրբեջանը խորը անհանգստությամբ հետևում է եղբայրական Ղազախստանում ստեղծված իրավիճակին։ Ադրբեջանն աջակցում է Ղազախստանում իրավիճակի շուտափույթ կարգավորմանը և օրենքի գերակայության վերականգնմանը։ Չի կարող լինել որևէ արդարացում ուժի անօրինական կիրառմանն ու բռնությանը, որը խաթարում է հասարակական կարգն ու սպառնում մարդու հիմնարար իրավունքներին ու քաղաքացիական ազատություններին։ Դրա համար այն պետք է վճռական կերպով դատապարտվի ու մերժվի։ Մենք հավատում ենք Ղազախստանի ժողովրդի և կառավարության իմաստությանն ու կարողությանը։ Մենք հավատում ենք, որ Ղազախստանը դուրս կգա իրավիճակից՝ չվտանգելով իր ձեռքբերումները, և ողջախոհությունը կհաղթի»,-ասել է Բայրամովը։
Նա նշել է, որ այդ ամենի հետ կապված Թյուքական պետությունների կազմակերպության առաջ կարևոր խնդիր է դրված։
«Կազմակերպությունը հիմնված է անդամ երկրների համերաշխության վրա, և մեր ընդհանուր պարտականությունն է աջակցել մեր ղազախ եղբայրներին ու քույրերին այս դժվարին ժամանակներում։ Մենք ողջունում ենք հունվարի 6-ի հռչակագիրը այն մասին, որ կազմակերպությունն անհրաժեշտության դեպքում պատրաստ է աջակցություն ցուցաբերել Ղազախստանին ստեղծված իրավիճակից ելք գտնելու հարցում»,-ասել է Ադրբեջանի ԱԳ նախարարը։
Էմմա Չոբանյան
