22.11.2024 | 17:15
Վեթինգի հակառակ կողմը․ հետաքննություններ՝ դատական համակարգում կոռուպցիա ծնող խորքային պատճառների մասին
Բաքուն կրկին հաստատել է՝ ամեն կերպ խոչընդոտելու է Հայաստանի և տարածաշրջանի հաղորդակցությունների ապաշրջափակմանը
Քաղաքականություն
23.12.2021 | 13:22
Բաքուն արձագանքել է ՀՀ փոխվարչապետ Մհեր Գրիգորյանի հայտարարությանը, որ չսպասելով Մեղրիի և Միջնավան-Հորադիզ հատվածներում նոր երկաթուղու կառուցմանը՝ պետք է Նախիջևանով դեպի Իրան հաղորդակցություն բացվի։
Մասնավորապես, նախօրեին Երևանում անցկացված հայ-ռուսական միջկառավարական հանձնաժողովի նիստից հետո Մհեր Գրիգորյանը լրագրողներին ասել էր, թե ինչ հարցեր են քննարկվում տարածաշրջանում ճանապարհների ապաշրջափակման թեմայով։ Նա նշել էր, որ տարածաշրջանային հաղորդակցությունների ապաշրջափակման աշխատանքային խումբը քննարկում է Երասխ-Հորադիզ երկաթուղու փուլային բացման տարբերակը:
Քննարկման դրված տարբերակներից մեկն այն է, որ չսպասելով Մեղրիի և Միջնավան-Հորադիզ հատվածներում նոր երկաթուղու կառուցմանը՝ բացվի Նախիջևանով դեպի Իրան հաղորդակցությունը։ Այդպիսով, Հայաստանը հնարավորություն կունենա երկաթուղային կապ հաստատել Իրանի հետ։
Ադրբեջանական իշխանությունների խոսափող haqqin.az-ն իր դիվանագիտական աղբյուրներին հղում կատարելով գրում է, որ հաղորդակցության ուղիների ապաշրջափակման բանակցային գործընթացում Ադրբեջանի դիրքորոշումն այն է, որ մինչև Աղբենդ-Մեղրի-Նախիջևան նոր երկաթուղու շահագործումը՝ խոսք լինել չի կարող Իրանի հետ Հայաստանի հաղորդակցության վերականգնման մասին Նախիջևանով, ինչպես նաև այլ ուղղություններով։
Այս հայտարարությունը ևս մեկ անգամ հաստատում է, որ Ադրբեջանը շարունակում է խախտել 2020 թվականի նոյեմբերի 9-ին և 2021 թվականի հունվարի 11-ի եռակողմ հայտարարությունների՝ տարածաշրջանային հաղորդակցության բոլոր ուղիների ապաշրջափակման մասով դրույթը և ցանկանում է ամեն կերպ Հայաստանին պահել ապաշրջափակման մեջ՝ դրա համար տարաբնույթ խոչընդոտներ ստեղծելով։
Բացի այդ, ադրբեջանական կողմի նման արձագանքը հաստատում է նաև ՀՀ վարչապետ Նիկոլ Փաշինյանի ավելի վաղ արված հայտարարությունները, որ Բաքուն խոչընդոտում է Հայաստանին դեպի Իրան և ՌԴ ճանապարհ տրամադրելուն։
Էմմա Չոբանյան
