19.05.2026 | 13:37
70 մլն դրամ փոխառություն, 2 առանձնատուն․ ինչ է հայտարարագրել ԴՕԿ-ի առաջին համարը
Ադրբեջանի ԱԳՆ-ն դիմել է Google-ին՝ Արցախի բնակավայրերի հայկական տեղանունները քարտեզում փոխելու համար
Քաղաքականություն
23.12.2021 | 13:10
Ադրբեջանի ԱԳՆ-ն նամակով դիմել է Google ընկերությանը՝ Google Maps-ում Արցախի բնակավայրերի հայկական տեղանունները փոխելու համար։ Այս մասին հայտնում են ադրբեջանական լրատվամիջոցները։
ԱԳՆ մամուլի ծառայության ղեկավար Լեյլա Աբդուլլաևան հայտնել է, որ Google Maps-ում Արցախի բնակավայրերի հայկական տեղանունների առկայություն հարցն Ադրբեջանի ուշադրության կենտրոնում է, և ադրբեջանական կողմը շարունակելու է «միջոցներ ձեռնարկել՝ դրանք վերացնելու համար»։
Աբդուլլաևան ասել է, որ Google ընկերության առաջ դիվանագիտական խողովակներով հարց է բարձրացվել այն մասին, որ Google Maps հավելվածի աշխարհագրական քարտեզներում «ադրբեջաներենի հետ մեկտեղ՝ նաև նրանց հայերեն աղավաղված անուններն են ներկայացված»։
«Ընկերության ղեկավարությանը նամակ է ուղարկվել «ադրբեջանական տարածքների աղավաղված» տեղանունների մասով։ Հակառակ կողմին ուղարկվել է Ադրբեջանի համապատասխան տարածքների պաշտոնական աշխարհագրական անվանումների ցուցակը»,- ասել է Աբդուլլաևան։
Նշենք, որ ամիսներ առաջ էլ Ադրբեջանի Մշակույթի նախարարությանն առընթեր մշակութային ժառանգության պահպանման, զարգացման և վերականգնման պետական ծառայության ղեկավար Ազադ Ջաֆարլին էր հայտարարել, որ բանակցություններ են վարում Google Maps-ի մշակողների հետ՝ Արցախի բնակավայրերի հայկական տեղանունները փոխելու համար։
Հավելենք, որ Արցախյան 44-օրյա պատերազմից հետո Ադրբեջանն ակտիվ գործողություններ է իրականացնում Google Maps-ում փոխելու Լեռնային Ղարաբաղի բնակավայրերի երկլեզու անունները և միայն ադրբեջաներեն տարբերակը թողնելու համար։ Ադրբեջանի բոլոր ջանքերն այս ուղղությամբ դեռևս ապարդյուն են։
Էմմա Չոբանյան
