18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
ՆԱՏՕ-ի արագ արձագանքման ուժերը բերվել են բարձր պատրաստվածության վիճակի․ Die Welt
Քաղաքականություն
22.12.2021 | 16:46
Ուկրաինայի հետ սահմանի մոտակայքում ռուսական զորքերի տեղաշարժով պայմանավորած՝ ՆԱՏՕ-ն բարձրացրել է իր 40 հազարանոց արագ արձագանքման ուժերի (NRF) մարտական պատրաստվածությունը։ Այս մասին դեկտեմբերի 22-ին հայտնել է գերմանական Die Welt պարբերականը՝ վկայակոչելով դաշինքում իր դիվանագիտական աղբյուրին։
Աղբյուրի փոխանցմամբ՝ երկուշաբթի օրվանից ՆԱՏՕ-ի բարձր պատրաստվածության միացյալ օպերատիվ խումբը (VJTF) պետք է պատրաստ լինի տեղակայվել ճգնաժամային գոտում 5 օրվա ընթացքում՝ նախկին յոթի փոխարեն:
NRF-ի մյուս ստորաբաժանումնները, այդ թվում՝ հատուկ նշանակության ուժերն ու ռազմական լոգիստիկան, ևս բերվել են բարձր պատրաստվածության վիճակի։ Die Welt-ի տեղեկությունների համաձայն՝ համապատասխան որոշումը նախորդ շաբաթ ընդունվել է Հյուսիսատլանտյան դաշինքի խորհրդի կողմից։
Հավելենք, որ VJTF-ի կազմի մեջ է մտնում շուրջ 6400 զինծառայող ԱՄՆ-ից, Մեծ Բրիտանիայից, Լեհաստանից, Իսպանիայից, Իտալիայից և Հյուսիսատլանտյան դաշինքի այլ անդամ երկրներից։
ՆԱՏՕ-ի անդամները VJTF-ը ղեկավարում են ռոտացիոն հիմունքներով: Ներկայում խմբավորումը գլխավորում է Թուրքիան, իսկ 2023 թվականին հրամանատարությունը կանցնի Գերմանիային։
Տաթև Ֆռանգյան
