Հաղորդաշարեր
18.12.2021 | 17:08«Քաղաքապետը պետք է ընտրվի քաղաքի բնակիչների, ոչ թե ավագանու կողմից: Իհարկե, կուսակցությունները կարող են ներկայացնել թեկնածուներ, բայց պետք է գործի նաև ինքնառաջադրման մեխանիզմ: Շատերը, ովքեր մտահոգ են քաղաքի ճակատագրով, ունեն գիտելիքներ, հաճախ մերժում են ավագանու մաս կազմել միայն այն պատճառով, որ պետք է լինեն որևէ կուսակցության ցուցակում: Կարծում եմ` այստեղ մեծ խնդիր կա»,- Factor TV-ի հետ զրույցում նման տեսակետ է հայտնում Երևանի պետական տիկնիկային թատրոնի գեղարվեստական ղեկավար և տնօրեն Ռուբեն Բաբայանը` անդրադառնալով Երևանի ավագանու «Իմ քայլը» խմբակցությունում գործող քաղաքապետ Հայկ Մարությանին անվստահություն հայտնելու եղանակով սկսված պաշտոնանկության գործընթացին:
Նա շեշտում է` անկախ այն հանգամանքից, թե ինչպես կհանգուցալուծվեն քաղաքապետին առնչվող իրադարձությունները, ժողովրդավար երկիրը ենթադրում է իշխանության հաղթանակ` ոչ բոլոր հարթակներում: Թատրոնի ղեկավարը բերում է արտերկրի օրինակը. շատ քաղաքներ, Ռուբեն Բաբայանի խոսքով, ղեկավարում է ընդդիմադիր ուժի ներկայացուցիչը, քանի որ կարևոր է ոչ թե կուսակցականությունը, այլ պետական շահը.
«Եթե խնդիր են դրել փոխել Հայկ Մարությանին, ուրեմն` կփոխեն, ինչպես նախորդ քաղաքապետի դեպքում եղավ, բայց դրանով մեր համակարգային խնդիրները չեն վերանա, պետական համակարգը չի բալանսավորվի»:
Թատրոնի ղեկավարն ընդգծում է` առհասարակ, երևանցիներին քիչ է հետաքրքրում, թե որ քաղաքապետն ում թիմից է, փոխարենը հետաքրքրում են աղբահանության, տրանսպորտի, մշակութային արժեքների պահպանության և այլ խնդիրներ: Անդրադառնալով դիտարկմանը, թե ժամանակին հանրությանը սևերի և սպիտակների բաժանած Հայկ Մարությանն այսօր ինքն է հայտնվել այդ տարբաժանման հորձանուտում, Ռուբեն Բաբայանը նշում է.
«Միշտ պետք է խոսելուց առաջ մտածել. սա վերաբերում է բոլորին: Բաժանումը ոչ մի լավ բանի չի բերում: Կյանքը դաժանորեն է պատժում կատարված արարքների ու հայտարարությունների համար»:
Թատրոնի ղեկավարը խոսում է նաև ԱԺ նախագահ Ալեն Սիմոնյանի` մեր գերիների մասին աղմկահարույց որակումների վերաբերյալ.
«Ալեն Սիմոնյանի այդ մտայնությունը չէր լինի, եթե մարդկային կյանքը մեր երկրում դիտարկվեր որպես մեծագույն արժեք: Այդ կյանքին նրբորեն է պետք վերաբերվել: Ո՞վ է իրեն հերոսի տեղ դրել, որ մեղադրում է ուրիշներին»:
Մանրամասները` տեսանյութում:
Աննա Բաբաջանյան
