30.03.2026 | 23:48
Բայրամովն ու Արաղչին հեռախոսազրույց են ունեցել
Ամասիայում նոր ընտրություննե՞ր կլինեն․ ավագանու ՔՊ-ական անդամներն ինքնաբացարկի դիմումներ են ներկայացրել
Քաղաքականություն
16.12.2021 | 15:49
Շիրակի մարզի Ամասիա խոշորացվող համայնքում դեկտեմբերի 5-ին կայացած ՏԻՄ ընտրություններում ամենաշատ ձայները հավաքած «Քաղաքացիական պայմանագիր» կուսակցության ավագանու անդամները ինքնաբացարկի դիմում են ներկայացրել։ Նրանք չեն վերցնելու մանդատները։
Այս մասին Factor.am-ին տեղեկացրեց ՔՊ-ի համայնքապետի թեկնածու Մերգել Ղարիբյանը, որը նաև Արփի խոշորացված համայնքի ղեկավարն է։ Ըստ Ղարիբյանի՝ խոշորացվող Ամասիայում համայնքապետը պիտի լինի ՔՊ-ից, քանի որ ձայների քանակով ՔՊ-ն է առաջատար, իրենց միակ պայմանն այդ է։ Ուշագրավ է, սակայն, որ ՔՊ-ն ընդամենը 16 ձայն է ավելի ստացել «Արփի Ամասիա» նորաստեղծ դաշինքից, ինչի արդյունքում ավագանիում երկու քաղաքական ուժերին էլ այս դեպքում բաժին է հասնում վեցական մանդատ։ ՀՀԿ-ն կստանա 3 մանդատ։
Ի սկզբանե, «Արփի Ամասիա» նորաստեղծ դաշինքը մտադիր էր կոալիցիա կազմել ՀՀԿ-ի հետ ու իշխանություն ձևավորվել՝ առանց ՔՊ-ի, այս մասին նրանք անգամ պաշտոնական հայտարարություն էին տարածել, սակայն որոշ ժամանակ անց իրավիճակը փոխվել է։ Տարածված տեղեկությունների համաձայն, «Արփի Ամասիա» նորաստեղծ դաշինքը պատրաստակամություն է հայտնել միավորվել ՔՊ-ի հետ՝ համայնքապետի պաշտոնում իր թեկնածուին՝ Ամասիա խոշորացված համայնքի ղեկավար Ջեմմա Հարությունյանին առաջադրելու պայմանով։ «Քաղաքացիական պայմանագիր» կուսակցությունն էլ չի համաձայնել այս առաջարկին։ ՔՊ-ի համայնքապետի թեկնածուն այս տեղեկությունը չցանկացավ մեկնաբանել։
Քիչ հետո թիվ 30 ընտրատարածքային հանձնաժողովը նիստ կգումարի՝ քննարկելով ինքնաբացարկի դիմումները։ Հանձնաժողովի նախագահ Արթուր Խաչատրյանն ասաց՝ պարզաբանումներ կներկայացնեն նիստից հետո։ Այսպիսով՝ չի բացառվում, որ Ամասիայում նոր ընտրություններ անցկացվեն։
Արմիկ Մովսիսյան
