ՌԴ-ն կարող է ձգտել պատժել Հայաստանին՝ Ջո Բայդենի գագաթնաժողովին մասնակցելու համար, բայց հայերից է կախված՝ որքանով են մտադիր հրաժարվել իրենց գործողությունների ազատությունից․ ամերիկացի վերլուծաբան

ԱՄՆ-ը կազմակերպեց «Հանուն ժողովրդավարության» գագաթնաժողովը՝ վերահաստատելու համար, որ ինքը ժողովրդավարական ազգերի առաջնորդն է․ մի պնդում, որը կասկածի տակ է դրվել Աֆղանստանից ԱՄՆ-ի դուրս գալուց և ԱՄՆ-ում ներքին ցնցումներից հետո: Factor.am-ի հետ զրույցում նման կարծիք հայտնեց ամերիկացի վերլուծաբան, գրող Դեյվիդ Սաթերը՝ անդրադառնալով ԱՄՆ նախագահ Ջո Բայդենի վարչակազմի նախաձեռնած «Հանուն ժողովրդավարության» գագաթնաժողովին։

Հիշեցնենք, որ դեկտեմբերի 9-10-ը Միացյալ Նահանգների նախագահը հեռավար ռեժիմով անցկացնելու է «Հանուն Ժողովրդավարության» գագաթնաժողովը, որին մասնակցության հրավեր է ստացել նաև պաշտոնական Երևանը։

ԱՄՆ 46-րդ նախագահ Ջո Բայդենն առաջին անգամ է նման վերտառութամբ գագաթնաժողով կազմակերպում։ Դրան, ըստ այս պահին եղած պաշտոնական տվյալների, հրավիրված են 110 երկրների կառավարությունների ղեկավարներ, փորձագետներ, քաղաքացիական հասարակության և մասնավոր հատվածի ներկայացուցիչներ։

Մեր հարևաններից հրավիրյալների շարքում է միայն Վրաստանը։ Ցուցակում ներառված չեն ո՛չ Ադրբեջանը, ո՛չ Թուրքիան, ո՛չ էլ Իրանը։ Հրավեր չեն ստացել նաև Ռուսաստանը և Չինաստանը։ Նախկին ԽՍՀՄ տարածքից, Մերձբալթյան երկրներից և Հայաստանից ու Վրաստանից բացի, հրավիրվել են միայն Մոլդովան և Ուկրաինան, չկա ԵՏՄ և ՀԱՊԿ անդամ երկրներից և ոչ մեկը։

«Ֆորումը շատ տեսանելի է, և ԱՄՆ-ը կարող է փորձել փոփոխություններ կատարել տարբեր մասնակիցների շրջանում, դիրքորոշումների փոփոխության արդյունքում, և դա հնարավոր է, այդ թվում՝ Հայաստանի դեպքում»,- ասաց Դեյվիդ Սաթերը։

Անդրադառալով գագաթնաժողովի պատճառով ԱՄՆ-ի և Ռուսաստանի միջև հասունացած նոր լարվածությանը՝ ամերիկացի վերլուծաբանը նշեց, որ այդ երկրների միջև հակամարտությունը միջազգային կյանքի մաս է:

«Ավելի վատ կլինի, եթե Ռուսաստանի ագրեսիան սաստկանա, հատկապես՝ Ուկրաինայի հարցում»,- ասաց նա։

Հայաստանն ընդունել է ժողովրդավարության թեմայով գագաթնաժողովին մասնակցելու ԱՄՆ-ի հրավերը։

Պատասխանեով դիտարկմանը, թե դրան ինչպե՞ս կարող է վերաբերել Հայաստանի դաշնակից Ռուսաստանը, որը քննադատում է  գագաթնաժողովի կազմակերպումը, Դեյվիդ Սաթերը նշեց․ «Ռուսաստանը կարող է ձգտել պատժել Հայաստանին գագաթնաժողովին մասնակցության համար, բայց հայերից է կախված, թե որքանով  են նրանք մտադիր հրաժարվել իրենց գործողությունների ազատությունից՝ Ռուսաստանին հաճոյանալու համար»։

Հռիփսիմե Հովհաննիսյան