27.11.2024 | 10:16
Դոլարն ու եվրոն արժևորվել են, ռուբլին՝ արժեզրկվել․ արտարժույթների փոխարժեքները՝ նոյեմբերի 27-ի դրությամբ
ՀԱՀ-ում «օմիկրոն» նոր շտամով վարակվածները հիվանդության ընթացքում դեռևս չեն բախվել բարդությունների
Քաղաքականություն
29.11.2021 | 21:26
Հարավային Աֆրիկայում կորոնավիրուսի «օմիկրոն» նոր շտամով վարակվածները հիվանդության ընթացքում դեռևս չեն բախվել բարդությունների: Այս մասին հայտարարել է SAMA առողջապահության ոլորտի աշխատողների ազգային ասոցիացիայի ղեկավար Անժելիկ Քութզեեն, գրում է DW-ի ռուսական ծառայությունը։
Նրա խոսքով՝ մինչ այժմ որևէ բարդություն չի նկատվել բժիշկների հսկողության տակ գտնվող SARS-CoV-2-ի այս տարբերակով վարակված հիվանդների մոտ։ Այնուամենայնիվ, «օմիկրոն» շտամի վերաբերյալ հետազոտությունները դեռ շատ վաղ փուլում են, հավելել է նա:
Նշենք, որ հենց Քութզեեն է նոյեմբերի 18-ին առաջին անգամ տեղեկացրել Հարավային Աֆրիկայի իշխանություններին երկրում կորոնավիրուսի նոր տարբերակի հայտնաբերման մասին։ Նա ընդգծել է, որ «օմիկրոն» շտամով վարակման ախտանշաններն անսովոր են, սակայն հիվանդները հեշտ են տանում այն։
«Ամենից հաճախ հիվանդները բողոքում են մարմնի ցավից ու չափից դուրս հոգնածությունից։ Մենք այս ախտանշանները գրանցել ենք երիտասարդների, ոչ տարեցների մոտ»,- մանրամասնել է բժիշկը։
Միևնույն ժամանակ, The Telegraph-ին տված հարցազրույցում նա նշել է, որ «օմիկրոն» շտամով վարակվելու հետևանքով բարդությունների հավանականությունը մեծ է շաքարախտով կամ սրտի հիվանդություններ ունեցող տարեց մարդկանց մոտ։
Տաթև Ֆռանգյան
