«Հրազդան» ՔԿՀ-ի դատապարտյալներն անհանգստանում են իրենց կյանքի և առողջության համար

ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի անդամները, ՀՀ ԱՆ «Հրազդան» ՔԿՀ-ի որոշ դատապարտյալների հետ զրուցելիս, պարզել են, որ նրանք այլ ՔԿՀ-ներ տեղափոխվելու հետ կապված կյանքին և առողջությանը սպառնացող լուրջ մտահոգություններ ունեն։

Ինչպես Factor.am-ի հետ զրույցում տեղեկացրեց խմբի նախագահ Զառա Հովհաննիսյանը, դատապարտյալները մտավախություն ունեն, որ այլ ՔԿՀ-ներում գուցե լուրջ խնդիրներ առաջ գան։

«Դատապարտյալներից մեկը մեզ հետ զրույցում հայտնել էր, որ անվտանգության հետ կապված խնդիրներ ունի «Նուբարաշեն» և «Արմավիր» ՔԿՀ-ներում, քանի որ իր հաղորդումների հիմքով այդ հիմնարկների որոշ աշխատակիցների վերաբերյալ քրեական գործեր են հարուցվել, մեկ ուրիշն էլ ասել էր, որ X հիմնարկի դատապարտյալների հետ անձնական խնդիրներ ունի, ուստի վախենում է հիմնարկի փոփոխությունից։ Այս մտահոգությունները միակը չեն, ուստի մենք որոշեցինք այս մասին հրատապ հաշվետությամբ ներկայացնել արդարադատության նախարարին»,- նշեց Հովհաննիսյանը։

Դիտորդական խումբը գրությամբ առաջարկել է տեղաբաշխման հարցը լուծելիս առաջնային ուշադրություն դարձնել անվտանգության հարցին, ինչպես նաև հաշվի առնել անձանց՝ ընտանիքներին հնարավորինս մոտ լինելու, առողջության հետ կապված, աշխատող դատապարտյալներին և այլ ՔԿՀ-ում կրկին աշխատանքով ապահովելու հարցերը․ «Նախարարությունից պատասխան գրությամբ մեզ տեղեկացրին, որ ՔԿՀ-ներում պահվող ազատությունից զրկված անձանց տեղաբաշխելիս հնարավորինս հաշվի է առնվում և առնվելու ազատությունից զրկված անձանց դիմումները, ինչպես նաև անվտանգությունը, առողջական վիճակը և այլ կարևոր հանգամանքներ: Հույս ունենք՝ խոստացված այս նկատառումները կպահպանվեն դատապարտյալներին տեղաբաշխելիս»։

Հիշեցնենք՝ հոկտեմբերի 28-ի Կառավարության նիստում գործադիրն ընդունեց «Կոշ» և «Հրազդան» քրեակատարողական հիմնարկների գործունեությունը դադարեցնելու մասին որոշումը։ Արդարադատության նախարար Կարեն Անդրեասյանի հիմնավորմամբ՝ այս որոշման կայացմամբ 2022 թվականին կխնայվի 1 մլրդ 200 մլն դրամ։

Ռոզա Վարդանյան