11.10.2026 | 15:59
Վթարային ջրանջատում Մալաթիա-Սեբաստիա և Էրեբունի վարչական շրջաններում
Գյումրիում 8 ամիս առաջ տեղի ունեցած վենդետայի գործը՝ դատարանում
Հասարակություն
22.11.2021 | 22:16
Շիրակի մարզի ընդհանուր իրավասության դատարանում մեկնարկել է Գյումրու «Մուշ» թաղամասում 2021 թվականի մարտի 15-ին 37-ամյա Ռաֆիկ Մնացականյանի սպանության գործով դատավարությունը։
Ամբաստանյալը նրանց հարևանն է՝ 34-ամյա Հրաչյա Արտուշի Թամոյանը, որին մեղադրանք է առաջադրվել ՀՀ Քրեական օրենսգրքի 4 հոդվածներով՝ 104 հոդվածի 2-րդ մասի 5-րդ կետով, 34-104 հոդվածի 1-ին մասով, 112 հոդվածի 1-ին մասով և 185-րդ հոդվածի 1-ին մասով։
Հրաչյա Թամոյանը մեղադրվում է 2021 թվականի մարտի 15-ին՝ ժամը 14:20-ի սահմաններում Ռաֆիկ Մնացականյանին առանձին դաժանությամբ սպանելու, օգնության հասած նրա ազգական Արմեն Տոնոյանի կյանքին դիտավորությամբ վտանգ սպառնացող ծանր վնաս պատճառելու, օգնության հասած նրա կնոջն էլ՝ Անուշ Սարդարյանին ապօրինաբար դիտավորությամբ կյանքից զրկելու փորձ կատարելու, իսկ 2021թ. մարտի 19-ին՝ ժամը 02:00-ի սահմաններում դիտավորությամբ «Արթիկ» քրեակատարողական հիմնարկի կարանտինային բաժանմունքի թիվ 01 խցի գույքը վնասելու մեջ։
Ըստ մեղադրանքի, Հրաչյա Թամոյանը, համոզված լինելով, որ 2021 թվականի հունվարի 30-ին՝ ժամը 10:45-ի սահմաններում Երևան-Գյումրի ավտոճանապարհի 56-րդ կիլոմետր հատվածում տեղի ունեցած ավտովթարի մեջ մեղավոր է իրենց հարևանը՝ «Մերսեդես Բենց» մակնիշի ավտոմեքենայի վարորդ, Գյումրի քաղաքի բնակիչ Ռաֆիկ Մնացականյանը, Գյումրի քաղաքի Մուշ 2 թաղամասի 10/2 շենքի բակում վրեժխնդիր է եղել նրանից։ Ավտովթարի հետևանքով մահացել էին Արտուշ և Էմիլ Թամոյանները՝ ամբաստանյալի հայրն ու մեծ եղբայրը։
Նա հաշվի էր կանչել Ռաֆիկ Մնացականյանին, իր հետ վերցրած դանակով բազմաթիվ հարվածներ հասցրել նրա կրծքավանդակի, որովայնի, գլխի, դեմքի, պարանոցի, աջ բազկի և ձախ քնային զարկերակի շրջաններին, պատճառել մարմնական վնասվածքներ: Եվ երբ Ռաֆիկ Մնացականյանը դիմել էր փախուստի ու ընկել շենքի բակում, Թամոյանը վազել էր նրա հետևից ու շարունակել դանակով հարվածներ հասցնել գետնին ընկած Ռաֆիկ Մնացականյանի դեմքին և առանձնակի դաժանությամբ սպանել նրան: Նա դանակի հարվածներ էր հասցրել նաև ամուսնուն օգնության հասած Անուշ Սարդարյանի պարանոցին։
Այս ամենը կատարվել էր օրը ցերեկով՝ Ռաֆիկ Մնացականյանի երեխաների, ծնողների ու հարևանների աչքի առաջ։
Այսօրվա դատական նիստը հետաձգվեց, քանի որ կալանավորին ուղեկցող ջոկի հրամանատարի պաշտոնակատարը դատարանին տեղեկացրել էր՝ աշխատանքային ծանրաբեռնվածության պատճառով իրենք չեն կարող ամբաստանյալին կալանավայրից տեղափոխել դատարան։ Ոստիկանական մեքենա չէր եղել։
Նշենք, որ այս նիստով դատավորը Նարեկ Բեգլարյանն է։
Արմիկ Մովսիսյան
