Որ ընդդիմադիր գործիչներին են հավատում քաղաքացիները․ հերթական սոցհարցումները՝ վարչապետի ընտրությանն ընդառաջ. ՏԵՍԱՆՅՈՒԹ

Ապրիլին սպասվող քաղաքական գործընթացներից առաջ սոցիոլոգիական հարցումներ իրականացնող «GALLUP International association»-ի հայաստանյան ներկայացուցչությունը մեր երկրում հերթական սոցհարցումն է անցկացրել։ Դեմառդեմ հարցման ենթարկված 1120 քաղաքացիներին ուղղվել են երկրի քաղաքական գործընթացների վերաբերյալ հարցեր՝ պարզելու համար քաղաքացիների վերաբերմունքը և՛ իշխանությունների, և՛ ընդիմության նկատմամբ։

Սոցհարցման արդյունքներն այսօր ասուլիսի ժամանակ ներկայացրեց «GALLUP International association»-ի հայաստանյան ներկայացուցչության ղեկավար Արամ Նավասարդյանը և ընդգծեց, որ այս տարի սոցհարցման ընթացքում տրվել են նոր հարցեր, որոնցից մեկն, օրինակ, վերաբերում է նրան՝ որքանով է քաղաքացին վստահում ընդդիմությանը:

«Լիովին վստահում են՝ 4,9 տոկոս, ավելի շուտ վստահում են՝ 19,3 տոկոս, ավելի շուտ չեն վստահում՝ 26,2 տոկոս, չեն վստահում՝ 43,7 տոկոս»,- ասաց Նավասարդյանը՝ նշելով, որ, ըստ հարցման տվյալների, իշխանությունն ու ընդդիմությունը նույն մակարդակի վրա են։

Սոցհարցման ընթացքում քաղաքացիները գնահատել են նաև ընդդիմադիր գործիչներին հինգ բալանոց սանդղակով: «Ամենաբարձր ցուցանիշը ստացել է Ժիրայր Սեֆիլյանը՝ 4,5 բալ, Նիկոլ Փաշինյանը ստացել է 4,3 բալ, ամենանվազ ցուցանիշը գրանցել է Ռոբերտ Քոչարյանը»,-ասաց «GALLUP International association»-ի հայաստանյան ներկայացուցչության ղեկավարը։

Վերջինիս փոխանցմամբ՝ սոցհարցման ընթացքում քաղաքացիները պատասխանել են նաև վարչապետի թեկնածուի մասին հարցին, և, ըստ արդյունքների, առաջատարներն այս հարցում Կարեն Կարապետյանն ու Սերժ Սարգսյանն են։

Ամբողջությամբ՝ տեսանյութում: