08.12.2025 | 23:30
Իլոն Մասկը կոչ է անում «վերացնել» ԵՄ-ն. Եվրահանձնաժողովին արգելվել է X-ում գովազդներ տեղադրել՝ 120 միլիոն եվրո տուգանքից հետո
Թողնելով հարազատ դպրոցը․ Արցախում 2600 տեղահանված աշակերտ պայքարում է կրթության իրավունքի իրացման համար․ ՏԵՍԱՆՅՈՒԹ
Հասարակություն
23.11.2021 | 17:02
Հադրութցի Արտեմ Սաֆարյանը երկար ճանապարհ է անցել մինչև Ստեփանակերտի թիվ 3 դպրոց հասնելը: Նա մեկն է այն հազարավոր աշակերտներից, որոնք Ադրբեջանի ագրեսիայի հետևանքով ստիպված են եղել թողնել հարազատ դպրոցը:
Ապրիլի տվյալներով՝ Արցախում ավելի քան 2600 տեղահանված աշակերտ կա: Այս թիվը, սակայն, փոփոխական է. որոշ տեղահանվածներ լքել են Արցախը, սակայն դրսում ապրուստի միջոց չգտնելով՝ շատերը վերադառնում են հայրենիք: Այս տարվա սեպտեմբերի տվյալներով, օրինակ, Ստեփանակերտի թիվ 3 միջնակարգ դպրոց է տեղափոխվել 282 հադրութցի աշակերտ, Ստեփանակերտի թիվ 2 միջնակարգ դպրոց՝ 270 շուշեցի աշակերտ: Ստեփանակերտի այս դպրոցներում տեղահանված աշակերտների ուսումնառությունը կազմակերպվում է երկրորդ հերթով:
ԱՀ ԿԳՄՍ նախարարի խորհրդական Ալենուշ Գրիգորյանը տեղեկացնում է՝ Ստեփանակերտի 12 դպրոցներում էլ կան տեղահանված աշակերտներ։ Նրանք բոլորը, սակայն, երազում են դպրոցի առանձին շենք ունենալու մասին:
Ուսուցչուհի Ալյոնա Դավթյանը, որը նույնպես Հադրութից է, հարցնում է՝ մինչև ե՞րբ պետք է հյուրի կարգավիճակում մնան: Նա նշում է, որ պատկան մարմինները խոստացել են լուծել խնդիրը, թե կոնկրետ երբ՝ չեն հստակեցրել: Ուսուցչուհին պատմում է երկրորդ հերթով դպրոց հաճախելու դժվարությունների մասին:
Արցախում հումանիտար խնդրի պայմաններում կրթության իրավունքի իրացման հարցը վտանգի տակ է նաև հեռավար ուսուցման շրջանակում ինտերնետ կապի և տեխնիկայի բացակայության պատճառով: Այժմ, երբ Արցախում համավարակի պատճառով աշակերտների մի մասն անցել է հեռավար ուսուցման, այդ խնդիրն առավել ակնհայտ է դարձել:
Նարե Սարյանը մինչև պատերազմի սկսվելն ապրում էր Հադրութում, ասում է՝ պարի խմբակ էր հաճախում, մի շարք մեդալներ, պատվոգրեր ու այլ պարգևներ ուներ: Դրանք մնացին սահմանից այն կողմ: Հիմա ընտանիքը վարձով բնակվում է Ստեփանակերտում, ինտերնետ կապից օգտվելու հնարավորություն, սակայն, չունի, համակարգիչ՝ ևս: Այս պայմաններում Նարեն հեռավար ուսուցմանը մասնակցելու հնարավորություն չունի:
Նարեի մայրը՝ Անյան, 4 անչափահաս զավակ ունի: Տղան, որը փայտամշակման ուսումնարան է հաճախում, ստիպված է մինչև գիշեր աշխատել՝ ընտանիքի հոգսը թեթևացնելու համար: Նա հեռավար կրթության համար ո՛չ ժամանակ ունի, ո՛չ էլ միջոցներ:
Արցախի Հանրապետության դեմ անցյալ տարի սանձազերծված պատերազմի հետևանքով ստեղծված հումանիտար խնդրի և այդ պայմաններում կրթության իրավունքի իրացման թեմայի վրա ՀՀ ԿԳՄՍ նախարարը ուշադրություն է հրավիրել միջազգային հարթակում։ Վահրամ Դումանյանն այդ մասին խոսել է ՅՈՒՆԵՍԿՕ-ի գլխավոր համաժողովի 41-րդ նստաշրջանի շրջանակում։ Որքանո՞վ միջազգային հանրությունը կարձագանքի խնդրին․ մինչ առարկայական արդյունքներ կլինեն՝ հազարավոր արցախցի երեխաներ շարունակում են զրկված մնալ կրթական իրավունքի լիարժեք իրացման հնարավորությունից։
Մանրամասները՝ տեսանյութում։
Աննա Բաբաջանյան
