ԵՐԵՎԱՆԻ ԺԱՄԱՆԱԿՈՎ․ՔՊ-ն` Փաշինյանի գլխավորությամբ, շարժվեց նախորդների ավանդույթով և որոշեց, որ պետք է բոլորին վերահսկի․Նարինե Դիլբարյան․ ՏԵՍԱՆՅՈՒԹ

«Մենք կարող ենք արձանագրել, որ բուհերի ապաքաղաքականացում տեղի չի ունեցել, գտնվում ենք նույն տրորված ճանապարհին, որի դեմ պայքարել ենք երկար ժամանակ: ՔՊ-ն` Նիկոլ Փաշինյանի գլխավորությամբ, շարժվեց նախորդների ավանդույթով և որոշեց, որ պետք է բոլորին վերահսկի: Մենք նույն ճահճում ենք»,-Factor.am-ի հետ զրույցում կարծիք է հայտնում լեզվաբան, ԵՊՀ դոցենտ Նարինե Դիլբարյանը` անդրադառնալով Հայաստանում բուհական ինքնավարության և ակադեմիական ազատությունների խնդիրներին:

Լեզվաբանն անդրադառնում է նաև հայոց լեզվի հետ կապված պետական հատուկ քաղաքականություն մշակելու հարցին. «Եթե պետությունը հայոց լեզվի հետ կապված հատուկ քաղաքականություն տաներ, մենք չէինք պարտվի այս պատերազմում: Մեզ աստիճանաբար մերձեցրին այն գաղափարին, որ հայոց լեզու իմանալը բոլորովին պարտադիր չէ «հպարտ» քաղաքացի լինելու համար, որ ամենակարևորը օտար լեզուն է, օտարի մեջ փրկիչ որոնելն է, իսկ սեփական պատմությունը մատուցեցին տարրական գիտելիքի մակարդակով»:

Նարինե Դիլբարյանը խոսում է նաև Հայաստանում ատելության խոսքի` լայն ծավալներ ստանալու մասին. «Մենք պետք է դադարենք հաճոյանալ ուրիշներին, վախենալ նրանցից, նրանց առջև հացկատակ լինել, իսկ ներսինների վրա թափել մաղձը. երբ դրսինների առջև նսեմանում ես, հետո գալիս, ստորացնում ես ներսիններին»:

Լեզվաբանը, անդրադառնալով Արցախի մի շարք բնակավայրերի բարբառների կորստի վտանգին` նկատում է. «Մենք չենք կարողանում համահավաք, արժանապատիվ կեցություն ապահովել, օրինակ՝ հադրութցիների համար, այդպիսով կորցնում ենք ժառանգորդական կապը: Հույս ունեմ` կհասկանանք, որ պետք է գրանցել բարբառակիրներին, տեղահանվածների համակեցությունն ապահովել և այլն: Որոշ անհատների ջանքեր կարող են արդյունք տալ, բայց խնդիրը կարող է լուծվել միայն պետության ջանքերով: Խաղաղությունը հաստատում են վճռական քայլերով, անընդհատ խոսելով հայկականության մասին»:

Մանրամասները` տեսանյութում:

Աննա Բաբաջանյան