Ամանորի տոներին ոչ աշխատանքային կմնա նաև հունվարի 2-ը

Այսօր Ազգային ժողովի պետաիրավական հարցերի մշտական հանձնաժողովը երկրորդ ընթերցմամբ հավանություն տվեց կառավարության ներկայացրած «ՀՀ տոների և հիշատակի օրերի մասին» ՀՀ օրենքում փոփոխություններ կատարելու մասին օրենքի նախագծին։ Նշենք, որ կատարվել են որոշակի փոփոխություններ և սահմանվել է, որ ամանորյա տոներին ոչ աշխատանքային օրեր կլինեն դեկտեմբերի 31-ից հունվարի 2-ը ներառյալ և հունվարի 6-ը: Խորհրդարանում նախագիծը ներկայացնելիս Էկոնոմիկայի նախարար Վահան Քերոբյանն ասաց, որ առաջարկում են փոփոխություն կատարել և հունվարի 2-ը ևս ընդգրկել ոչ աշխատանքային օրերի ցանկում։ Առաջարկն ընդունվեց։ Այսպիսով` Ամանորին և Սուրբ Ծննդյան տոնին ոչ աշխատանքային կլինեն դեկտեմբերի 31-ից հունվարի 2-ը ներառյալ և հունվարի 6-ը:

ԱԺ «Հայաստան» խմբակցության պատգամավոր Աղվան Վարդանյանը նշեց, որ իրենց խմբակցությունն առաջարկել էր հունվարի 2-ը և 7-ը թողնել ոչ աշխատանքային: Նա հիշեցրեց նաև, որ Մայր Աթոռը ևս առաջարկել էր ոչ աշխատանքային թողնել նաև հունվարի 5-ը և 7-ը: Նախարար Քերոբյանը նշեց, որ ընդհանուր դիրքորոշումը ձևավորելիս հաշվի են առնում առաջարկները: Անդրադառնալով Մայր Աթոռի առաջարկին՝ նա վստահեցրեց, որ դա ևս մանրամասն քննարկվել է։ «Էկոնոմիկայի նախարարությունը նաև շատ կարևորում է պետություն-մասնավոր երկխոսությունը, և նախագիծը քննարկվել է նախարարության ՓՄՁ ենթախորհրդում, բազմաթիվ ասոցիացիաների հետ հանդիպումների ընթացքում: Այնուամենայնիվ, հաշվի առնելով այն փիլիսոփայությունը, որ դրել ենք այս օրենքի փոփոխության մեջ՝որոշում է կայացվել այսպիսի տարբերակով առաջ գնալ»,-շեշտեց Քերոբյանը։

Հիշեցնենք, որ դեռևս չփոփոխված նախագծով առաջարկվում էր ոչ աշխատանքային թողնել միայն դեկտեմբերի 31-ը, հունվարի 1-ը և 6-ը: Իսկ փոփոխված նախագիծն ուժի մեջ կմտնի, եթե ԱԺ լիագումար նիստում նույնպես հավանության արժանանա։

Մերի Մարտիրոսյան