12.02.2026 | 10:00
Ազգային ժողովի նիստը՝ ՈՒՂԻՂ
Պարենային ապրանքների համաշխարհային գները հասել են նոր առավելագույնի՝ գերազանցելով 2011թ․ հուլիսի մակարդակը
Քաղաքականություն
05.11.2021 | 14:27
Հոկտեմբերին պարենամթերքի համաշխարհային գներն աճել են 3%-ով՝ 2011 թվականի հուլիսից ի վեր հասնելով գագաթնակետին։ Այս մասին են վկայում ՄԱԿ-ի Պարենի և գյուղատնտեսության կազմակերպության (FAO) տվյալները։
Հոկտեմբերին FAO-ի սննդամթերքի գների ինդեքսի միջին ցուցանիշը, որը թույլ է տալիս ամեն ամիս հետևել առավել մեծ պահանջարկ ունեցող մթերքների համաշխարհային գների տատանումներին, կազմել է 133,2 կետ, որը 3 տոկոսով ավելի բարձր է սեպտեմբերյան մակարդակի համեմատ։ Այսպիսով, այս ինդեքսի աճը շարունակվում է արդեն 3-րդ ամիսն անընդմեջ։
Բուսական յուղի գների ինդեքսը հոկտեմբերին աճել է 9.6%-ով՝ հասնելով պատմական առավելագույնին։ Այս թանկացումն առաջին հերթին պայմանավորված է արմավենու, սոյայի, արևածաղկի ձեթի թանկացմամբ։ Մասնավորապես, արմավենու յուղը թանկացել է չորրորդ ամիսն անընդմեջ։ Սա հիմնականում պայմանավորված է Մալայզիայում արտադրության ցածր ծավալների հետ, քանի որ այնտեղ աշխատանքային միգրանտների պակաս կա:
Հացահատիկի գների ինդեքսն աճել է 3.2%-ով։ Ամենից շատ թանկացել է ցորենը։
Կաթնամթերքի գների ինդեքսն աճել է 2.6%-ով։ Սա ամենից շատ անդրադարձել է կարագի, ինչպես նաև յուղազերծված կաթի փոշու և կաթի վրա: Միևնույն ժամանակ, պանրի գները մնացել են կայուն, քանի որ հիմնական արտահանող երկրների կողմից առաջարկի ծավալները բավարարել են պահանջարկի համաշխարհային ծավալներին, նշել են FAO-ում։
Ըստ կազմակերեպության՝ մսի գնի միջին ինդեքսը նվազում է երրորդ ամիսն անընդմեջ։ Հոկտեմբերին ցուցանիշը նվազել է 0․7%-ով։ Խոզի մսի համաշխարհային գներն ընկել են Չինաստանից գնումների նվազման, իսկ տավարի մսինը՝ Բրազիլիայից մատակարարվող մսի գնի կտրուկ անկման հետևանքով:
Տաթև Ֆռանգյան
