16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Թուրքիայի իշխող կուսակցության գործիչները Էրդողանի տեսանյութերն են հրապարակում՝ հերքելու նախագահի հիվանդության մասին պնդումները
Քաղաքականություն
03.11.2021 | 20:58
Թուրքիայի իշխող «Արդարություն և զարգացում» կուսակցության գործիչները համացանցում տարածում են նախագահ Ռեջեփ Թայիփ Էրդողանի տեսանյութերը՝ փորձելով հերքել տարածվող պնդումները, որ նախագահը լուրջ հիվանդ է, գրում է Duvar-ը։
«Վստահություն տալով ընկերներին ու վախ ներշնչելով թշնամիներին»,- թվիթերյան միկրոբլոգում գրել է նախագահի աշխատակազմի հաղորդակցության գծով տնօրեն Ֆահրեթթին Ալթունը և հրապարակել քայլող Էրդողանի տեսանյութը։
Թուրքիայի նախագահի անձնական լուսանկարիչը ևս տեսանյութ է հրապարակել, որտեղ Էրդողանը ինքնաթիռ է նստում։
«19 տարի․․»,- գրել է Մուրատ Չեթինմյուհյունդարը՝ նկատի ունենալով ԱԶԿ-ի կառավարման 19 տարին։
Եվս մեկ տեսանյութ հրապարակել է ԱԶԿ-ի Անկարայի նահանգային կառույցի ղեկավար Հաքան Հան Օզջանը՝ գրելով․ «Շնագայլերը տեղ են գտնվում՝ թաքնվելու համար, Աստծո առյուծն այստեղ է»։
ԱԶԿ-ի պատգամավոր Ահմեդ Չամլին տեսանյութ չի հրապարակել, բայց վստահեցրել է, որ Էրդողանը լիովին առողջ է։
«Ղեկավարը Ստամբուլից ժամանել է Անկարա։ Նա շատ առողջ է։ Նրանք, ովքեր փորձում են կծել, ատամները կկորցնեն։ Մի՛ լսեք փոքրիկ սատանաներին»,- գրել է պատգամավորը։
Նշենք, որ այս գրառումներն արվում են՝ հերքելու Էրդողանի առողջության վատթարացման մասին համացանցում տարածվող լուրերը։ Այս պնդումներն անում են ինչպես քաղաքական գործիչները, այնպես էլ սոցցանցերի օգտատերերը։ Օրերս էլ համացանցում լայնորեն քննարկվում էր մի տեսանյութ, որում Էրդողանը դժվարությամբ է քայլում։
Էմմա Չոբանյան
