19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Զինվորականների կողմից պաշտոնանկ արված Սուդանի վարչապետը համաձայնել է գլխավորել նոր կառավարությունը․ լրատվամիջոցներ
Քաղաքականություն
03.11.2021 | 18:25
Զինվորականների կողմից պաշտոնանկ արված Սուդանի վարչապետ Աբդալլա Համդուկը համաձայնել է վերադառնալ ու կրկին գլխավորել երկրի կառավարությունը։ Այս մասին հայտնում է Al Arabiya-ն՝ հղում անելով անանուն աղբյուրներին։
Ըստ այդ տեղեկությունների՝ որպես վերադարձի պայման Համդուկը պահանջել է ազատ արձակել բոլոր քաղբանտարկյալներին, որոնք ձերբակալվել են վերջին բողոքի ցույցերի ժամանակ, գրում է DW-ի ռուսական ծառայությունը։
Համանման տեղեկություն է տարածել նաև Al Hadath TV հեռուստաալիքը։ Այս լուրերի պաշտոնական հաստատում դեռևս չկա։
Իր հերթին Reusters-ը, հղում անելով Աբդալլա Համդուկի մերձավոր շրջապատին, գրում է, որ ռազմական հեղաշրջմամբ Սուդանում իշխանությունը գրաված զինվորականները շարունակում են բանակցությունները հեռացված վարչապետի հետ։ Գործակալության զրուցակիցները հերքել են, որ Համդուկը համաձայնել է ղեկավարել նոր կառավարությունը։
Հիշեցնենք, որ վերջին շաբաթների ընթացքում սրված ճգնաժամի պայմաններում Սուդանի զինվորականները հոկտեմբերի 25-ին զավթել են իշխանությունը և երկրում արտակարգ դրություն հայտարարել։ Պուտչիստների առաջնորդ, գեներալ Աբդել Ֆաթահ ալ-Բուրհանը հայտարարել է կառավարության և, այսպես կոչված, Ինքնիշխան խորհրդի լուծարման մասին, որը վերահսկում էր երկրի ժողովրդավարացման գործընթացը և ներառում ինչպես զինվորականների, այնպես էլ քաղաքացիական անձանց։
Տաթև Ֆռանգյան
