23.02.2026 | 23:30
Ադրբեջանը նույնպես հետաքրքրություն է հայտնել Եվրոպական խաղաղության գործիքակազմի շրջանակներում օգնություն ստանալու հարցում
Վրաստանի ընդդիմությունը Սաակաշվիլիի առողջական վիճակի պատճառով բոյկոտել է խորհրդարանի աշխատանքը
Քաղաքականություն
02.11.2021 | 17:36
Վրաստանի ԱԺ «Լելո-Գործընկերություն հանուն Վրաստանի» խմբակցությունը հրաժարվում է աշխատել խորհրդարանում, քանի դեռ պետությունը բանտում համապատասխան խնամք չի տրամադրել երրորդ նախագահ Միխայիլ Սաակաշվիլիին և նրան չի տեղափոխել բազմամասնագիտական քաղաքացիական կլինիկա, գրում է «Նովոստի-Գրուզիան»:
Այսօր կայացած ճեպազրույցի ժամանակ խմբակցության անդամները հայտարարել են, որ այլևս չեն մասնակցի խորհրդարանի լիագումար նիստերին։
«Պատմության մեջ չեն մնա մանրամասները, ոչ ոք չի հիշի, թե ինչ մեղադրանքներով է Միխայիլ Սաակաշվիլին ձերբակալվել, սակայն մեր շատ բարդ քաղաքական պատմության մեջ ևս էջով կմնա Միխայիլ Սաակաշվիլիի առողջական վիճակի վատթարացումն ու նրա կյանքի սպառնալիքը»,- հայտարարել է խմբակցության անդամ Սալոմե Սամադաշվիլին։
Երկուշաբթի Սաակաշվիլին դիմել է իր հիմնադրած «Միացյալ ազգային շարժում» կուսակցության պատգամավորներին՝ հորդորելով վայր դնել մանդատները և լքել խորհրդարանը։ Աննա Ցիտլիձեն և Նոնա Մամուլաշվիլին հայտարարել են, որ պատրաստ են հետևել այս կոչին, սակայն նրանք դեռևս պաշտոնապես չեն դիմել խորհրդարանին՝ պատգամավորական լիազորություններից հրաժարվելու մասին հայտարարությամբ։
Տաթև Ֆռանգյան
