31.03.2026 | 23:28
Իրանը հերքում է Թուրքիայի ուղղությամբ հրթիռային հարձակումը և կրկին համատեղ հետաքննություն առաջարկում
Չավուշօղլուն հայտարարել է, որ Անկարան պատասխանատվություն չի կրում Ուկրաինայի կողմից Դոնբասում «Բայրաքթար»-ների կիրառման համար
Քաղաքականություն
01.11.2021 | 16:30
Թուրքիան պատասխանատվություն չի կրում Ուկրաինայի կողմից ռուսամետ զինյալների դեմ հակամարտությունում թուրքական անօդաչու թռչող սարքերի կիրառման համար։ Թուրքական լրատվամիջոցմերի հաղորդմամբ՝ այս մասին նախօրեին հայտարարել է Թուրքիայի ԱԳ նախարար Մևլութ Չավուշօղլուն Հռոմում G20-ի գագաթնաժողովի շրջանակում իր ռուս գործընկեր Սերգեյ Լավրովի հետ հանդիպումից հետո։
«Եթե երկիրը զենք է գնում մեզանից կամ մեկ այլ երկրից, այնուհետ այդ զենքը չի կարող պիտակավորվել թուրքական, ռուսական կամ ուկրաինական։ Եթե երկիրը մեզանից գնում է զենքը, դրանից հետո այդ արտադրանքն այլևս թուրքական չէ։ Այն կարող է արտադրվել Թուրքիայիում, բայց պատկանում է Ուկրաինային։ Թուրքիային չի կարելի մեղադրել դրանում»,- ասել է Չավուշօղլուն՝ նշելով, որ Ուկրաինան պետք է դադարի Թուրքիայի անունը հիշատակելը։
Նշենք, որ օրերս Ուկրաինան առաջին անգամ Դոնբասում մարտական գործողություններում կիրառել էր թուրքական «Բայրաքթար» անօդաչու թռչող սարքեր՝ ոչնչացնելով հակառակորդի հրետանային համակարգը։
ՌԴ նախագահի մամուլի խոսնակ Դմիտրի Պեկսովը, մեկնաբանելով թուրքական անօդաչուների կիրառումը, նշել էր, որ «Բայրաքթար» հարվածային անօդաչուների մատակարարումն Ուկրաինային կարող է հանգեցնել բացասական հետևանքների և Դոնբասում իրադրության ապակայունացման։
«Մենք իսկապես առանձնահատուկ և լավ հարաբերություններ ունենք Թուրքիայի հետ, բայց այս դեպքում, ցավոք, հաստատվում են մեր մտավախությունները, որ ուկրաինացի զինվորականներին զենքի նման տեսակների մատակարարումը կարող է հանգեցնել շփման գծում իրավիճակի ապակայունացման»,- ասել էր Պեսկովը։
Հավելենք, որ Ուկրաինան թուրքական «Բայրաքթար» անօդաչուների ակտիվ գնորդներից է։
Էմմա Չոբանյան
