Արմեն Չարչյանի գործով այսօր հրատապ նիստ է հրավիրվել 

«Իզմիրլյան» բժշկական կենտրոնի տնօրեն Արմեն Չարչյանի գործով այսօր հրատապ դատական նիստ է նշանակվել։ Այս մասին ֆեյսբուքյան իր էջով հայտարարություն է տարածել Չարչյանի պաշտպան էրիկ Ալեքսանյանը:

«Արմեն Չարչյանի գործով այսօր ժամը 15։30-ին հրատապ նիստ է հրավիրվել։ Բժշկական հանձնաժողովն արդեն ստեղծված է»,- գրել է փաստաբանը։

Նշենք, որ «Վարդաշեն» ՔԿՀ-ում պրոֆեսոր Չարչյանի առողջական վատ վիճակը պայմանավորված է նրա մոտ առկա շաքարային դիաբետով։

«Պնդում եմ՝ Արմեն Չարչյանի մոտ ախտորոշված հիվանդությունն անհամատեղելի է կալանավորման հետ, և պրոֆեսորն օր առաջ պետք է ազատ արձակվի»,- հայտարարել էր պաշտպանը։

Հիշեցնենք, որ ԱԺ արտահերթ ընտրությունների նախընտրական քարոզարշավի ժամանակ հրապարակվել էր ձայնագրություն, որում «Իզմիրլյան» բժշկական կենտրոնի տնօրեն Արմեն Չարչյանը  աշխատակիցների հետ հանդիպմանը հորդորում էր պարտադիր կարգով մասնակցել ընտրություններին։ Ձայնագրության հրապարակումից հետո հաշված ժամերի ընթացքում ՀՔԾ-ում հարուցվեց քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով։ Նա ձերբակալվեց, ապա հունիսի 23-ին մեկ ամսով կալանավորվեց։ Հուլիսի 21-ին՝ դատավոր Վահե Միսակյանը 15 միլիոն գրավի դիմաց ազատ արձակելու որոշում կայացրեց, որը Դատախազության կողմից բողոքարկվեց Վերաքննիչ դատարանում։ Վերաքննիչ քրեական դատարանը՝ դատավոր Ռուբեն Մխիթարյանի նախագահությամբ, որոշում կայացրեց բավարարել բողոքը և «Հայաստան» դաշինքի անդամ, «Իզմիրլյան» բժշկական կենտրոնի նախկին տնօրեն Արմեն Չարչյանին կրկին կալանավորեց։ 

Ռոզա Վարդանյան