07.11.2024 | 16:33
Օրենքը գրելիս, որ շատ մտածեինք, գուցե ասեինք՝ անտառապահները մնան որպես ժամանակավոր էկոպարեկներ․ ՏԵՍԱՆՅՈՒԹ
ՀԱՊԿ-ը նոյեմբերի 8-ից 12-ը Ռուսաստանի տարածքում խաղաղապահների զորավարժություններ կանցկացնի
Քաղաքականություն
01.11.2021 | 12:17
Նոյեմբերի 8-ից 12-ը Ռուսաստանի տարածքում կանցկացվեն Հավաքական անվտանգության պայմանագրի կազմակերպության (ՀԱՊԿ) երկրների «Անքակտելի եղբայրություն 2021» խաղաղապահ զորավարժությունները։ Այս մասին երկուշաբթի լրագրողներին հայտնել են զորավարժությունների համատեղ մամուլի կենտրոնից, գրում է ՏԱՍՍ-ը։
«Կարմիր դրոշի դպրոցի Ժուկովի բարձրագույն տանկային հրամանատարության Կազանի զորավարժարանում ՀԱՊԿ զորքերի խմբավորումը կմշակի ՀԱՊԿ Հավաքական խաղաղապահ ուժերի կողմից խաղաղապահ գործողության նախապատրաստման և անցկացման խնդիրները»,- հայտնել են մամուլի կենտրոնից։
Նշվում է, որ հիմնական խնդիրները լինելու են ՀԱՊԿ Հավաքական ուժերի հրամանատարության և վերահսկման մարմինների հմտությունների կատարելագործումը զորքերի կազմակերպման և ղեկավարման գործում։ Նախատեսվում է նաև բարելավել ՀԱՊԿ խաղաղապահ ուժերի կազմի մեջ մտնող զորամասերի և ստորաբաժանումների համախմբվածությունը։
Գործնական վարժանքների ընթացքում խաղաղապահ ուժերը կմշակեն գործողություններ անցկետերում, փախստականների ճամբարներում, մարդասիրական բեռների շարասյուների ուղեկցում, բնակավայրի արգելափակում, «զինյալների» կողմից գրավված շենքի գրոհ, ինչպես նաև «պատանդների» ազատ արձակում ու տուժածներին օգնության ցուցաբերում։
Զորավարժություններին կներգրավվեն կազմակերպության երկրների ռազմական կոնտինգենտները, ռազմական ոստիկանության ստորաբաժանումները, միացյալ շտաբի և ՀԱՊԿ քարտուղարության օպերատիվ խմբերը, ներքին գործերի մարմինների, ազգային գվարդիայի, ինչպես նաև Արտակարգ իրավիճակների նախարարության կազմավորումները։
Վարժանքների եզրափակիչ փուլին հրավիրված են ՀԱՊԿ խորհրդարանական վեհաժողովի, Սերբիայի, Ուզբեկստանի և Մոնղոլիայի, ինչպես նաև Կարմիր խաչի միջազգային կոմիտեի և այլ միջազգային կազմակերպությունների ներկայացուցիչներ։
Տաթև Ֆռանգյան
