Տնտեսություն
29.03.2018 | 13:53
Լուսանկարը՝ 29.03.2018թ. ժամը՝ 12:30, Երևան, Պուշկինի փողոց
ՀՀ կառավարության ղեկավար Կարեն Կարապետյանի հանձնարարականներից մեկը վերաբերում էր «Մաքուր Հայաստան» ծրագրի շարունակությանը:
Վարչապետը նշեց, որ 2017 թվականի փետրվարի 16-ին մեկնարկած «Մաքուր Հայաստան» ծրագրի շրջանակներում ընդունված գործողությունների ծրագիրը Տարածքային կառավարման և զարգացման նախարարության կողմից ղեկավարվող միջգերատեսչական հանձնաժողովի կողմից կատարվել է:
«Արդյունքում՝ կազմակերպվել է 3 համապետական շաբաթօրյակ, 2018 թվականի մարտի դրությամբ արձանագրված 2031 աղբանոցներից մաքրվել կամ կոնսերվացվել են 1622-ը, իսկ դեռևս փակման ենթակա են 108-ը: Բոլոր մարզերում ստեղծվել են համապատասխան հանձնաժողովներ և աշխատանքային խմբեր, գործադիր իշխանության մարմիններում նույնպես նշանակվել են «Մաքուր Հայաստան» ծրագրի պատասխանատուներ»,- նշեց Կարապետյանը:
Կառավարության ղեկավարը, սակայն, ընդգծեց՝ աղբահանության պայմանագրերի կնքման և վճարների հավաքագրման մասով պայմանագրերի թիվը չնայած առկա դրական զարգացումների, դեռևս բավարար և ընդունելի չէ։ «Հաշվի առնելով այն, որ աղբահանության ոլորտում դեռևս առկա է համակարգված նոր միջոցառումների կատարման անհրաժեշտություն, ինչպես նաև ընթացիկ, սեզոնային խնդիրներին հրատապ լուծման կարիք, հանձնարարում եմ տարածքային կառավարման և զարգացաման նախարարին, մարզպետներին, առաջարկում եմ Երևանի քաղաքապետին և համայնքների ղեկավարներին՝ տասնօրյա ժամկետում համագործակցելով հանրապետական գործադիր մարմինների ղեկավարների հետ՝ մշակել «Մաքուր Հայաստան» ծրագրի շրջանակներում նոր գործողությունների ծրագիր` սահմանելով հստակ ժամանակացույց և ըստ ոլորտի գործողությունների պատասխանատուներ, միաժամանակ ընդգրկելով հնարավոր բոլոր շահագրգիռ կառույցների մասնակցությունն ու օժանդակությունը»,- ընդգծեց գործադիրի ղեկավարը:
Կարապետյանը նաև հանձնարարեց ծրագիրը մշակելիս նախատեսել, որ իրավաբանական անձանց հետ աղբահանության պայմանագրերի կնքման աշխատանքները պետք է ավարտին հասցվեն մինչև հունիսի 1-ը և թերությունների դեպքում կկիրառվեն պատասխանատվության միջոցներ։
«Հարկավոր է նախատեսել նաև տարվա կտրվածքով 4 շաբաթօրյակների կազմակերպման գրաֆիկ, ինչպես նաև հատկապես ուշադրություն դարձնել առաջիկայում նախատեսված համապետական միջոցառումներին, զբոսաշրջային ուղղություններին, պատմամշակութային տարածքների և բնական ու պատմական հուշարձանների տարածքները մաքուր պահելու գործողություններին»,- հավելեց Կարեն Կարապետյանը:
Բացի այդ, տարածքային կառավարման և զարգացման նախարարին գործադիրի ղեկավարը հանձնարարեց նախատեսված աշխատանքները ավարտելուն պես մինչև ապրիլի 15-ը Կառավարության աշխատակազմ ներկայացնել համապատասխան նոր գործողությունների ծրագիրը, ինչպես նաև ապահովել ապրիլի 14-ին համապետական շաբաթօրյակի կազմակերպմանն ուղղված նախապատրաստական աշխատանքների իրականացումը:
