Քթարտադրությունը դարձել է կորոնավիրուսի ախտանշաններից մեկը․ Դավիթ Մելիք-Նուբարյան

Դեռ կորոնավիրուսային համավարակի սկզբում Առողջապահության համաշխարհային կազմակերպությունը 1․5 մետրը սահմանեց որպես նվազագույն սոցիալական հեռավորություն։ Երբ վերջերս ի հայտ եկավ կորոնավիրուսի դելտա շտամը, մասնագետները հայտնեցին, որ այն ավելի արագ է տարածվում է և ավելի հաճախ է հանգեցնում հոսպիտալացման։ Արդյոք այս շտամով վարակվելու հավանականությունը նվազեցնելու համար  սոցիալական հեռավորությունն ավելի շատ չպիտի՞ լինի․ Factor.am-ն այս հարցն ուղղեց հանրային առողջության մասնագետ Դավիթ Մելիք-Նուբարյանին։

«Այդ հեռավորությունը սահմանված չէ շտամի վարակելիության աստիճանով պայմանավորված․ դա ուրիշ չափանիշներից է կախված։ Հեռավորությունը սահմանված է այն բանի համար, որ վիրուսը գտնվում է կշռված մասնիկների մեջ՝ խոսելիս, այլ գործողություն իրականացնելիս ինչքան հեռավորությունից կարող է անցնել։ Հեռավորությունը կախված է այն բանից, թե մենք մեր բնականոն գործունեության ընթացքում միջինում ինչ հեռավորության վրա կարող ենք արտազատել վիրուսը»,- պարզաբանեց մասնագետը։

Մելիք-Նուբարյանը հիշեցնում է, որ պատվաստված մարդը 100%-ով պաշտպանված չէ վարակումից, և հակահամաճարակային կանոնները պահպանելը նույնպես մնում է արդիական։

«Դելտա շտամի բժշկական հետևանքների մասին, որպես այդպիսին, վաղ է խոսել, մենք ընդհանուր առմամբ գիտենք, որ աշխարհում կա «լոնգ քովիդ» հասկացությունը։ Եթե մի քանի ամիս առաջ խոսում էինք, որ, օրինակ, 6-ից մեկի մոտ է առաջանում լոնգ քովիդ՝ այսինքն քովիդի ախտանշանները անցնելուց հետո դեռ մի քանի ամիս մարդիկ ունենում են շնչառության խնդիրներ, անհանգստություն, տագնապ և այլն, ապա հիմա 3-ից մեկի մոտ է առաջանում։ Իհարկե, վստահ չենք, որ սա պայմանավորված է դելտա շտամով, դեռևս ուսումնասիրման փուլում է»,- նշեց բժիշկը։

Անդրադառնալով կորոնավիրուսային հիվանդության ախտանշաններին՝ մասնագետն ասաց, որ կան շուրջ երկու տասնյակ ախտանշաններ, որոնց մի մասն է ավելի հաճախ հանդիպում։ Մելիք-Նուբարյանն ընդգծեց՝ քովիդի ախտանշաններից է դարձել  քթարտադրությունը։

«Իմ խորհուրդն է բոլոր այն մարդկանց, որոնք ունեն շնչառական հիվանդության ախտանշաններ՝ կոկորդում ցավ, քթից արտադրություն, գլխացավ, մկանային ցավեր, ջերմություն, համ ու հոտի որոշակի կորուստ, չզբաղվել ինքնաբուժությամբ, դիմել բժկի և թեստավորվել»,- նշեց բժիշկը։

Նա բոլորին հորդորում է պատվաստվել և դիմակ կրել։

Արփի Հակոբյան